Давлат хавфсизлик хизмати Фарғона ва Хоразм вилоятларида ОТМга ўқишга киритиш билан боғлиқ ноқонуний ҳолатларга чек қўйди.
Хусусан, ДХХ Фарғона вилояти бўйича бошқармаси ходимлари томонидан Бош прокуратура ҳузуридаги департаментнинг ҳудудий бошқармаси билан ҳамкорликда тезкор тадбир ўтказган. Тадбирда Қўқон шаҳридаги банклардан бирининг мутахассиси ўзганинг ишончига кириб, мансабдор танишлари ёрдамида, унинг ўғлини Қўқон давлат педагогика институтига ўқишга киритиб қўйиш эвазига 4 минг доллар олган вақтида ушланган.
Тезкор суриштирув ҳаракатлари давомида, у ушбу пул маблағини мазкур олий таълим муассасасида декан лавозимида ишловчи шахсга бериши кераклиги аниқланиб, тезкор тадбир давом эттирилган ва у ҳам пулни олган вақтида ашёвий далиллар билан ушланган.
Бошқа ҳолатда эса Фарғона шаҳридаги хусусий университет директорининг ўринбосари (муқаддам фирибгарлик билан боғлиқ жинояти учун судланган) фуқаронинг Ўш давлат педагогика университетидаги ўқишини Чирчиқ давлат педагогика институтига кўчириб бериш эвазига 2,5 минг доллар олган вақтида ушланган.
Хоразм вилоятида кузатилган ҳолатда, Урганч туманида яшовчи 35 ёшли шахс ўзганинг ишончига кириб, мансабдор танишлари ёрдамида уни Урганч давлат университетининг Бошланғич таълим йўналишига ўқишга киритиб қўйиш эвазига 3,5 минг доллар олган вақтида Давлат хавфсизлик хизмати ва Иқтисодий жиноятларга қарши курашиш департаменти ходимлари томонидан қўлга олинган.
Ҳозирда мазкур шахсларга нисбатан жиноят ишлари қўзғатилиб, тергов ҳаракатлари олиб борилмоқда.
Ноқонуний ўқишга киритиш ҳолатлари
Аввалроқ, Фарғона, Андижон, Гулистон давлат университетлари ва “Нархоз”га ўқишга киритиб қўйиш эвазига пул олган шахслар ушлангани хабар қилинганди. Шунингдек, Андижонда ўқишга киритишни ваъда қилиб, 4 минг АҚШ доллари олган ОТМ ходими қўлга олинган эди.
Изоҳ (0)