“Давлат иштирокидаги корхоналар ва тижорат банкларини ислоҳ қилиш механизмини такомиллаштириш бўйича қўшимча чора-тадбирлари тўғрисида”ги президент қарори қабул қилинди, деб хабар беради Norma.
Ҳужжат билан президентнинг 2023 йил 1 мартдаги “Давлат иштирокидаги корхоналарни ислоҳ қилиш жараёнларини жадаллаштириш чора-тадбирлари тўғрисида”ги қарорининг иловасида кўрсатилган давлат иштирокидаги йирик корхоналар ва тижорат банклари устав капиталидаги давлат акция (улушлари) пакетлари Иқтисодиёт ва молия вазирлигига ўтказилади.
Бунда Иқтисодиёт ва молия вазирлигига уларни ислоҳ қилиш ваколатлари ва вазифалари юклатилди.
Белгиланишича, Тикланиш ва тараққиёт жамғармасига тегишли акциялар бўйича барча акциядорлик масалалари юзасидан қарорлар Иқтисодиёт ва молия вазирлиги томонидан мустақил қабул қилинади.
Ташкилотларнинг устав капиталидаги Тикланиш ва тараққиёт жамғармасига тегишли акция пакетлари (улушлари) бўйича дивидендлар ҳамда ушбу акция пакетлари сотилишидан тушадиган маблағлар мазкур жамғармага ўтказилади.
Бир ой муддатда UzAssets инвестиция компанияси ташкилий тузилмаси ва ички корпоратив ҳужжатларини, ижроия органи ва кузатув кенгаши таркибини қайта тасдиқлаш режалаштирилмоқда.
Ҳужжат қонун ҳужжатлари маълумотлари миллий базасида эълон қилинган ва 2023 йил 21 августдан кучга кирган.
Бундан олдин Ўзбекистондаги тўртта аэропорт бошқаруви хусусий секторга топширилиши, “Foton” заводини хусусийлаштириш жараёни бошлангани, Ўзбекистонда 3 та давлат банки қолади, қолганлари хусусийлаштирилиши тўғрисида хабар берилганди.
Изоҳ (0)