Тошкент шаҳридаги умумтаълим мактабларида навбатчиликка мажбурланаётгани ҳақида хабар таралди. Тошкент шаҳар мактабгача ва мактаб таълими бошқармаси бунга муносабат билдирди.
Блогер Никита Макаренконинг ёзишича, мактаб директорларидан бири унга аноним мурожаат қилиб, Мустақиллик байрами муносабати билан барча директорларга ўқитувчилар кундузги ва тунги навбатчилиги графигини тузиш топширилганини маълум қилган. Навбатчилик 25 августдан 10 сентябргача бўлиши кераклиги айтилган.
Тошкент шаҳар мактабгача ва мактаб таълими бошқармаси аноним тарзда берилган юқоридаги хабар ёлғонлигини билдирди.
“Ҳозиргача бошқарма ҳамда туман мактабгача ва мактаб таълими бўлимлари масъуллари томонидан бирорта таълим муассасаси маъмуриятига байрам ёки бошқа сабаблар туфайли ўқитувчилар навбатчилигини йўлга қўйиш топшириғи берилмаган”, — дейилади бошқарма муносабатида.
Шунингдек, бу каби ёлғонлар тарқатмасликни, мабодо шундай ҳолат юзага келса Тошкент шаҳар мактабгача ва мактаб таълими бошқармаси ишонч телефони — 71 237 08 30 рақамига қўнғироқ қилишни сўради.
Бундан аввал Тошкентдаги мактабда ўқитувчилар мажбурий меҳнатга жалб қилингани ҳақида хабар тарқалганди. Тошкент шаҳар мактабгача ва мактаб таълими бошқармаси мактабда “Ободонлаштириш ойлиги” доирасида хайрли тадбир ташкил қилингани, бу ижтимоий тармоқ саҳифаларида нотўғри талқин қилингани билдирганди.
Олий Мажлис Қонунчилик палатасида депутатлар томонидан “Педагогнинг мақоми тўғрисида”ги қонун лойиҳаси қабул қилиниб, Сенатга маъқуллаш учун юборилганди. Қонун билан педагогларнинг куз-қиш даврида ва байрам кунларида таълим ташкилотида навбатчиликка жалб этишга йўл қўйилмаслиги ҳам назарда тутилган.
Изоҳ (0)