Россиянинг Белгород вилояти Валуйский округи Лавий қишлоғидаги санаторийга қилинган дронлар ҳужуми оқибатида уч нафар тинч аҳоли вакили ҳалок бўлди, деб хабар бермоқда вилоят раҳбари Вячеслав Гладков.
“Украина Қуролли кучлари одамлар кўчада пайти дрондан портловчи мосламаларни ташлади”, — деб ёзган Гладков Telegram да.
Унинг сўзларига кўра, икки киши воқеа жойида, яна бири кейинроқ касалхонада вафот этган.
Дастлаб Гладков санаторийга дрондан иккита граната ташланганини ёзди. Ўша хабарида у ҳалок бўлганлар ва жароҳатланганлар ҳақида маълумоти йўқлигини билдирди, Гладков фақат санаторий биносида деразалар сингани ва деворларга шикаст етганини айтди.
Россиянинг Украинага кенг кўламли босқини бошланганидан бери Белгород вилояти расмийлари вилоят чегара ҳудудлари ўққа тутилаётгани ёки деярли ҳар куни дронлар ҳужумига учраётгани ҳақида хабар бермоқда.
Эслатиб ўтамиз, 23 августга ўтар кечаси “Москва Сити”даги бинога дрон келиб урилди, Москва вилоятида яна иккита дрон уриб туширилди.
Изоҳ (0)