Россиянинг Белгород вилояти губернатори Вячеслав Гладков вилоятнинг Украина томонидан ўққа тутилиш муаммосининг ечими Харьков вилоятини қўшиб олиш эканини айтди. “РБК” ёзишича, Гладков “Россия 24” телеканали эфирида минтақа хавфсизлиги учун нима қилиш керак, деган саволга жавоб берган.
“Харьковни Белгород вилоятига қўшиб олиш”, — деган Гладков.
“Бунинг имкони борлигига ишонасизми?” — сўраган мухбир.
“Бу Белгород вилояти — Харьков вилоятининг ўққа тутилиш муаммоларини ҳал қилишнинг энг яхши йўли”, — деб такрорлаган губернатор.
Гладков “Россия 24” телеканалига берган интервьюсида, шунингдек, Белгород вилояти нафақат мунтазам равишда ўққа тутилаётгани, балки Украинадан “диверсант-разведка гуруҳлари” вилоят ҳудудига кириб келаётганини айтган.
“Биз амалда уруш шароитида яшаяпмиз. Кимгадир ёқса-ёқмаса, бу давом этяпти. Душман келмоқда, Грайворондаги сўнгги воқеалардан олдин бизга бешта диверсант-разведка гуруҳлари кириб келганди”, — дейди Гладков.
Аввалроқ, Белгород вилояти ҳукумати вакиллари “диверсантлар”нинг бостириб киришга уринишлари олди олингани ҳақида бир неча бор маълум қилишган. 22 май куни Белгород вилояти ҳокимияти “Украина Қуролли кучларининг диверсант-разведка гуруҳи” Грайворон шаҳар округи қишлоқларига кирганини эълон қилди. Глотово, Козинка ва Гора-Подил аҳоли пунктларида жанглар кечгани хабар қилинди. Эртаси куни Россия Мудофаа вазирлиги россиялик ҳарбийлар украиналик “диверсантларни мағлуб этгани” ҳақида хабар берди. Воқеа учун жавобгарликни Украина томонида жанг қилаётган “Россия озодлиги легиони ва Россия кўнгиллилар корпуси ўз зиммасига олди.
Изоҳ (0)