23 августга ўтар кечаси “Москва Сити”даги қурилиши битмаган бинога дрон келиб урилди. Москва мэри Сергей Собяниннинг сўзларига кўра, бинога “қўшни иккита беш қаватли уй ойналари синган”. Қурбонлар йўқ, деди у. Етказилган зарар миқдори баҳоланмоқда.
Собяниннинг сўзларига кўра, яна иккита дрон Москвага яқинлашаётганда — Москва вилоятининг Можайск ва Химки туманларида уриб туширилган. Кимки шаҳрида учувчисиз учоқ вайроналари шахсий уйга зарар етказган: уйнинг томи қисман қулаган, ойналари синган, шунингдек, дўконлар жойлашган нотурар жой биносига зарар етган, деб хабар бермоқда “РИА Новости” фавқулодда хизматларга таяниб. Одамлар жабрланмаган.
Россия Мудофаа вазирлиги “Киев режимининг яна бир терактга уриниши” тўхтатилгани ҳақида хабар берди. Вазирлик баёнотида айтилишича, “Москва Сити”даги дрон “электрон уриш тизими билан бостирилган” ва назоратдан чиқиб кетиб, қулаган. Москва вилоятида иккита дрон ҳаво ҳаво ҳужумидан мудофаа тизимлари томонидан йўқ қилинган.
Дрон ҳужуми туфайли Москва ҳаво узелининг аэропортлари рейсларни қабул қилиш ва жўнатишни вақтинча тўхтатди. Иккита самолёт муқобил аэродромларга йўналтирилди, деб ёзади “РБК” Федерал ҳаво транспорти агентлигига таяниб.
Сўнгги бир неча ҳафта ичида Москва ва Москва вилояти мунтазам равишда учувчисиз учоқлар ҳужумига учради. Хусусан, 21—22 август кунлари Москва вилоятида дронлар уриб туширилди, 18 августда эса Москва шаҳри яқинидаги нотурар жой биносига учувчисиз учоқ қулади.
Изоҳ (0)