Россия президенти Владимир Путин уруш бошланганидан кейин ўз яхтасини таъмирлашга 3 миллиард рубль сарфлади, дейди Алексей Навалний жамоаси. 22 август, сешанба куни Навалний сайтида чоп этилган суриштирувга кўра, бошқа шахс номидан рўйхатдан ўтган бўлса-да, Владимир Путинга тегишли бўлган “Грэйсефул” суперяхтасининг таъмирланиши Россия президентига 3 миллиард рублга тушган.
Навалний жамоасининг таъкидлашича, Путинга тегишли бўлган бошқа иккита яхта — “Шеҳразада” ва “Олимпия”да бўлгани каби “Грэйсефул”да ҳам Россия Федерал хавфсизлик хизмати ходимлари ишлайди, бу яхтани Путин ўша ҳудудларда бўлиб турган вақтда Россия портларида бир неча бор кўришган.
Путиннинг энг қиммат яхтаси “Шеҳразада” Европа Иттифоқи санкциялари туфайли 2022 йилнинг май ойида Италия портларидан бирида қўлга олинганди. Аммо уруш бошланишидан олдин Путин “Грэйсефул”ни Германиядаги таъмир жойидан Россияга қайтариб келишга муваффақ бўлди.
Шундан сўнг, яхтани таъмирлаш Россияда давом этди, дейди суриштирув муаллифлари. Улар ҳавола қилган ҳисоб-китоблар ва лойиҳаларга кўра, яхтада бошқа нарсалар қаторида вертолёт майдончаси, пианино ва телевизорли дам олиш хонаси, озиқ-овқат лифти, спорт зали, рақс майдончаси, кино зали ва бассейн бор. Навалний жамоасининг қайд этишича, унинг катта қисми қайта тикланган – таъмирлаш харажатлари тахминан 3 миллиард рубль ёки 32 миллион долларни ташкил қилган.
Изоҳ (0)