Шавкат Мирзиёев Ҳайдар Алиев қабрига гул қўйиб, хотирасига ҳурмат бажо келтирди (фото)

Шавкат Мирзиёев Боку шаҳрига келгач, Озарбайжон халқининг умуммиллий етакчиси Ҳайдар Алиев мангу қўним топган Фахр хиёбонига ташриф буюрди. Бу ҳақда Президент матбуот хизмати хабар берди.

Қайд этилишича, Ҳайдар Алиевнинг мустақил Озарбайжонни барпо этиш ва мустаҳкамлаш йўлидаги хизматлари беқиёс. Мамлакатнинг жадал ривожланиш даври ва халқаро майдондаги нуфузининг юксалиши айнан унинг исми билан боғлиқ.

Қардош ўзбек халқи билан дўстона муносабатларни мустаҳкамлашга доимо алоҳида эътибор қаратган Ҳайдар Алиевни мамлакатда яхши билишади. Ўзбекистонда унинг юз йиллик юбилейи кенг нишонланди. Шу муносабат билан почта маркалари босилган, турли маданий-маърифий ва илмий тадбирлар ўтказилган эди.

Тошкентда Озарбайжон халқининг умуммиллий етакчиси номидаги кўча, унга бағишланган хиёбон ва ёдгорлик очилган. Шавкат Мирзиёев буюк давлат ва сиёсат арбоби Ҳайдар Алиев қабрига гул қўйиб, хотирасига ҳурмат бажо келтирди.

22-23 август кунлари Шавкат Мирзиёевнинг Озарбайжонга давлат ташрифи амалга оширилмоқда. Унинг доирасида икки давлат раҳбарлари иштирокида олий даражадаги икки томонлама музокаралар ва бошқа тадбирлар бўлиб ўтиши режалаштирилган.

Бундан ташқари, давлат ташрифи кун тартибига Ўзбекистон-Озарбайжон стратегик шериклик муносабатларини янада чуқурлаштириш ва устувор йўналишлар бўйича амалий ҳамкорликни кенгайтириш масалалари киритилиб, унинг натижасида қатор икки томонлама битимлар қабул қилиниши кутилмоқда.

Мазкур давлат билан сиёсий ҳамкорлик соҳасидаги ютуқлар:

Мамлакатлар мустақилликнинг дастлабки йилларида дипломатик муносабатлар ўрнатган бўлса, ўшандан буён 13 марта олий даражадаги ўзаро ташрифлар амалга оширилди.

2017 йилдан бошлаб олий даражадаги мулоқот фаоллашгани делегациялар алмашинувининг кучайишига хизмат қилди – 6 йил давомида 70 дан ортиқ олий даражадаги ташрифлар амалга оширилди.

2017 йилдан буён мамлакатлар раҳбарлари ўртасида 9 та телефон суҳбатлари бўлиб ўтди. Бундан ташқари, халқаро ташкилотларнинг юқори даражадаги учрашувлари ўтказилмоқда. 

Хусусан, 2022 йилнинг 14-15 сентябрь кунлари Самарқанд шаҳрида Ўзбекистон ва Озарбайжон президентларининг ШҲТ Давлат раҳбарлари кенгаши мажлиси доирасида икки томонлама учрашуви бўлиб ўтди. Илҳом Алиев саммитда фахрий меҳмон сифатида иштирок этди.

2022 йил 10-11 ноябрь кунлари I.Алиев рафиқаси, Биринчи висе-президент М.Алиева билан биргаликда ТDT Давлат раҳбарлари кенгаши мажлисида иштирок этиш учун Самарқандга ташриф буюрди.
Ўзбекистон президенти 2023 йил 1-2 март кунлари Қўшилмаслик ҳаракати саммитида иштирок этиш учун амалий ташриф билан Озарбайжонда бўлди.