Shavkat Mirziyoyev Boku shahriga kelgach, Ozarbayjon xalqining umummilliy yetakchisi Haydar Aliyev mangu qo‘nim topgan Faxr xiyoboniga tashrif buyurdi. Bu haqda Prezident matbuot xizmati xabar berdi.
Qayd etilishicha, Haydar Aliyevning mustaqil Ozarbayjonni barpo etish va mustahkamlash yo‘lidagi xizmatlari beqiyos. Mamlakatning jadal rivojlanish davri va xalqaro maydondagi nufuzining yuksalishi aynan uning ismi bilan bog‘liq.
Qardosh o‘zbek xalqi bilan do‘stona munosabatlarni mustahkamlashga doimo alohida e’tibor qaratgan Haydar Aliyevni mamlakatda yaxshi bilishadi. O‘zbekistonda uning yuz yillik yubileyi keng nishonlandi. Shu munosabat bilan pochta markalari bosilgan, turli madaniy-ma’rifiy va ilmiy tadbirlar o‘tkazilgan edi.
Toshkentda Ozarbayjon xalqining umummilliy yetakchisi nomidagi ko‘cha, unga bag‘ishlangan xiyobon va yodgorlik ochilgan. Shavkat Mirziyoyev buyuk davlat va siyosat arbobi Haydar Aliyev qabriga gul qo‘yib, xotirasiga hurmat bajo keltirdi.
22-23 avgust kunlari Shavkat Mirziyoyevning Ozarbayjonga davlat tashrifi amalga oshirilmoqda. Uning doirasida ikki davlat rahbarlari ishtirokida oliy darajadagi ikki tomonlama muzokaralar va boshqa tadbirlar bo‘lib o‘tishi rejalashtirilgan.
Bundan tashqari, davlat tashrifi kun tartibiga O‘zbekiston-Ozarbayjon strategik sheriklik munosabatlarini yanada chuqurlashtirish va ustuvor yo‘nalishlar bo‘yicha amaliy hamkorlikni kengaytirish masalalari kiritilib, uning natijasida qator ikki tomonlama bitimlar qabul qilinishi kutilmoqda.
Mazkur davlat bilan siyosiy hamkorlik sohasidagi yutuqlar:
Mamlakatlar mustaqillikning dastlabki yillarida diplomatik munosabatlar o‘rnatgan bo‘lsa, o‘shandan buyon 13 marta oliy darajadagi o‘zaro tashriflar amalga oshirildi.
2017-yildan boshlab oliy darajadagi muloqot faollashgani delegatsiyalar almashinuvining kuchayishiga xizmat qildi – 6 yil davomida 70 dan ortiq oliy darajadagi tashriflar amalga oshirildi.
2017-yildan buyon mamlakatlar rahbarlari o‘rtasida 9 ta telefon suhbatlari bo‘lib o‘tdi. Bundan tashqari, xalqaro tashkilotlarning yuqori darajadagi uchrashuvlari o‘tkazilmoqda.
Xususan, 2022-yilning 14-15-sentabr kunlari Samarqand shahrida O‘zbekiston va Ozarbayjon prezidentlarining SHHT Davlat rahbarlari kengashi majlisi doirasida ikki tomonlama uchrashuvi bo‘lib o‘tdi. Ilhom Aliyev sammitda faxriy mehmon sifatida ishtirok etdi.
2022-yil 10-11-noyabr kunlari I.Aliyev rafiqasi, Birinchi vise-prezident M.Aliyeva bilan birgalikda TDT Davlat rahbarlari kengashi majlisida ishtirok etish uchun Samarqandga tashrif buyurdi.
O‘zbekiston prezidenti 2023-yil 1-2-mart kunlari Qo‘shilmaslik harakati sammitida ishtirok etish uchun amaliy tashrif bilan Ozarbayjonda bo‘ldi.
Izoh (0)