Қашқадарёдаги Деҳқонобод давлат ўрмон хўжалиги ҳудудида 17 туп арчага шикаст етказилди. Бу ҳақда Экология, атроф-муҳитни муҳофаза қилиш ва иқлим ўзгариши вазирлиги хабар қилди.
Ҳолат вилоят Экология бошқармаси Деҳқонобод туман инспекцияси ходимлари томонидан олиб борилган рейд давомида аниқланган. Деҳқонобод давлат ўрмон хўжалиги “Кон” ўрмон бўлимининг “Сувлисой” массиви ҳудудида табиий ҳолда ўсган 6 туп Зарафшон арчаси таг қисмидан, 11 туп арчанинг эса ён шохлари кесиб ташланган.
Ҳолат юзасидан ўрмон қўриқчиси Р.Ж.га нисбатан Маъмурий жавобгарлик тўғрисидаги кодекснинг 79-моддаси, 3-қисми билан маъмурий баённома расмийлаштирилиб, 3,3 миллион сўм жаримага тортилган.
Табиатга етказилган 18 миллион 84 минг сўм зарарни ундириш мақсадида ҳужжатлар тегишли тартибда расмийлаштирилиб, Деҳқонобод Давлат ўрмон хўжалигига ўтказилган.
Аввалроқ Қашқадарёдаги болалар шифохонаси ҳудудида 17 туп дарахт кесилгани аниқланганди. Айни пайтда ҳолат ҳуқуқни муҳофаза қилиш идоралари томонидан ўрганилмоқда.
Изоҳ (0)