Андижон вилояти Қўрғонтепа туманида нон ишлаб чиқариш цехи электр энергиясидан ноқонуний фойдаланиб келаётгани аниқланди, деб хабар беради Энергетика вазирлиги матбуот хизмати.
Маълум қилинишича, “Ўзэнергоинспекция” томонидан ҳуқуқни муҳофаза қилувчи органлар ва “Ҳудудий электр тармоқлари” АЖ билан ҳамкорликда Андижон вилоятида назорат тадбирлари ўтказилган. Бундай тадбирлар давомида Қўрғонтепа тумани, “Жомий” МФЙда фаолият юритиб келаётган “Ф.З.” МЧЖ томонидан электр энергиясидан ноқонуний фойдаланиш ҳолати аниқланган.
Ушбу МЧЖга қарашли тўйхонадаги нон ишлаб чиқариш цехининг электр қурилмалари электр ўлчов приборларидан ташқари электр тармоғига уланиб, 387 минг кВт/соат электр энергиясидан ноқонуний фойдаланиб келгани ва бу билан таъминот корхонасига 174,1 миллион сўм миқдорда зарар келтиргани маълум бўлган.
Ушбу ҳажмдаги электр энергияси ҳозирги кунда 1,9 мингта хонадоннинг бир ойлик истеъмолига тенгдир.
Аниқланган ҳолат юзасидан расмийлаштирилган ҳужжатлар белгиланган тартибда ҳуқуқни муҳофаза этувчи органларга тақдим қилинган.
Ўзбекистонда 2023 йилнинг 6 ойида электр энергиясидан ноқонуний фойдаланиш туфайли 78,5 миллиард сўм, табиий газдан ноқонуний фойдаланиш сабабли эса 231 миллиард 866 миллион сўм зарар кўрилган. Бундан олдин Бухоро шаҳрида фаолият юритиб келаётган корхона электр ҳисоблагичга ташқи таъсир кўрсатиши натижасида тизимга 2 миллиард сўмлик зарар етказилгани тўғрисида хабар берилганди.
Изоҳ (0)