Нигер янги бош вазири Россия ёки “Вагнер” билан ҳамкорлик қилиш нияти йўқлигини айтди

Нигерда исёнчи ҳарбийлар томонидан тайинланган бош вазир Али Маҳаман Ламин Зейннинг айтишича, мамлакат Россия ёки “Вагнер” хусусий ҳарбий компанияси билан ҳамкорлик қилишни режалаштирмаяпти. Бундан ташқари, Зейн қатор соҳаларда ҳамкорлик тугатилганига қарамай, Франциянинг мамлакатдан чиқиб кетишига қарши.

Зейн бу ҳақда The New York Times газетасига берган интервьюсида айтган. У Нигер ҳарбийларининг Россия ёки “Вагнер” билан ҳамкорлик қилиш нияти йўқлигини таъкидлаган.

“Нигерликларни исталмаган шериклар томон ундаманг”, — дея бош вазирдан иқтибос келтиради NYT.

Зейн француз расмийларини такаббурликда айблади, аммо у Франция Нигерда қолишини истамоқда.

 “Биз Франция университетларида, офицерларимиз эса Францияда малака оширган. Биз шунчаки ҳурмат қилишларини истаймиз”, — дея тушунтирди у.

NYT Зейннинг ҳамма гапларини келтирмаган, у қайси контекстда Франция ҳақида гапираётгани номаълум. Газета фақатгина Нигерда 1,5 минг француз аскари қолаётганини таъкидлади, улар исёнчилар талабига қарамай, мамлакатни тарк этишдан бош тортган.

Бундан ташқари, Зейннинг фикрича, келажакда АҚШ билан ҳарбий ҳамкорликка баҳо бериладиган вақт келади. Бироқ у Оқ уйнинг можарони дипломатик йўл билан ҳал қилишга чақирувчи “ўта оқилона позициясини” олқишлади.

Зейн Нигер президентига зарар етмаслигини ваъда қилди

Бош вазир исёнчилар ҳокимиятдан ағдарилган президент Муҳаммад Базумга зарар етказишни режалаштирмаганини даъво қилмоқда. Зейн Нигерда “зўравонлик анъанаси” йўқлигини таъкидлади. The New York Times эса 1999 йилда Нигер президенти ҳарбийлар томонидан ўлдирилганини эслатиб ўтди.

Исёнчилар “Вагнер”га ёрдам сўраб мурожаат қилгани ҳақида Associated Press манбалари хабар берганди. АҚШ Давлат котиби ўринбосари Виктория Нуланд Нигерга ташрифи чоғида, ҳарбийларни “Вагнер” ёлланма аскарларининг мамлакатда пайдо бўлишидан келиб чиқадиган хавфлар ҳақида огоҳлантирган.

Нуланднинг сўзларига кўра, ҳарбийлар агар “Вагнер” аскарлари мамлакатга таклиф қилинса, суверенитетга хавф туғдиришини яхши тушунаётгандек кўринган.

Франция собиқ мустамлакаси бўлган Нигер Ғарб давлатларининг Саҳелдаги сўнгги иттифоқчиларидан бири бўлиб келаётганди. Ҳарбий тўнтаришдан сўнг мамлакатда Франция контингентига қарши норозилик намойишлари бўлиб ўтмоқда. Ҳокимиятни эгаллаб олган ҳарбийлар Париж билан ҳамкорлик қилишдан бош тортмоқда.