Нигер ҳарбийлари президент Базумни “давлатга хиёнат” учун суд қилишга ваъда берди

Июль ойи охирида Нигерда давлат тўнтаришини амалга оширган ҳарбий хунта раҳбарияти ҳокимиятдан ағдарилган президент Муҳаммад Базумни “судга тортиш” ниятида эканини маълум қилди. Бу ҳақда ҳарбийлар томонидан тузилган Ватан мудофааси бўйича миллий кенгаш вакили, катта полковник Амаду Абдраман Нигер миллий телевидениесида маълум қилди.

Хунта вакилининг сўзларига кўра, терговда Базум ҳамда унинг “маҳаллий ва хорижий шерикларини ватанга хиёнат қилгани, шунингдек, Нигернинг ички ва ташқи хавфсизлигига путур етказгани бўйича” ваколатли миллий ва халқаро органлар олдида жавобгарликка тортиш учун етарли далилларни тўплашга муваффақ бўлинган.

Ушбу баёнотида Абдраман, тўнтаришдан сўнг Ғарбий Африка давлатлари иқтисодий ҳамжамияти (ECOWAS) томонидан Нигерга нисбатан қўйган санкцияларни қоралаб, уларни “ноқонуний, ғайриинсоний ва камситувчи” деб атади.

Воситачилар делегацияси раҳбари: хунта музокараларга тайёр

ECOWAS ва Нигердаги ҳарбийлар ўртасида воситачилик қилаётган Нигерия мусулмон диний етакчилар делегацияси раҳбари шайх Бала Лаунинг маълум қилишича, Ватан мудофааси бўйича миллий кенгаш раҳбари Абдураҳмон Тчиани ҳарбий хунта ва ECOWAS блоки ўртасидаги қарама-қаршиликни дипломатик йўл билан ҳал этиш масаласини кўриб чиқишга тайёр. 12 август куни делегация Нигер поятахти Ниамейга ташриф буюриб, у ерда режим вакиллари билан учрашган.

Лаунинг сўзларига кўра, Тчиани “тўнтариш яхши ният билан” амалга оширилгани, ҳарбийлар “ҳам Нигер, ҳам Нигерияга яқинлашиб келаётган таҳдиднинг олдини олишга” уринганини айтган.

Аввалроқ ҳарбийлар ECOWAS делегациясини Нигерга киритмаган эди. Хунта вакиллари музокарачилар хавфсизлигини таъминлай олмаслигини айтган. Шунга қарамай, ECOWAS парламенти хунта билан учрашиш учун янги воситачилар делегациясини шакллантиришга чақирган.

Нигерда ҳарбий тўнтариш

Нигерда 26 июль куни ҳарбий тўнтариш содир бўлди. Президент гвардияси давлат раҳбари Муҳаммад Базумни ҳокимиятдан четлатди. Икки кундан сўнг президент гвардияси бошлиғи генерал Абдураҳмон Тчиани ўзини янги давлат раҳбари деб эълон қилди.

ECOWAS мамлакатлари Нигерга ҳарбийларни киритишга тайёрлигини эълон қилди. Бунга жавобан давлат тўнтаришлари натижасида ҳокимиятга келган ҳарбийлар томонидан бошқариладиган Мали ва Буркина-Фасо “Нигер ишларига ҳар қандай ҳарбий аралашув уларга қарши уруш эълон қилиш билан баробар бўлишини” билдирди