Хорижлик санъаткорлар мухлислар таъқибига учрагани ва унга суиқасд уюштиришга уринишгани ҳақида кўп эшитганмиз. Қарангки, ўзбек санъаткорлари орасида ҳам бундай “мухлислар”дан безор бўлганлар бор.
Феруза Норматова: “Умра сафаригача кузатиб боришибди”
— Аввалига бу ҳақида айтишимни ота-онам исташмаган эди. Атрофимда психопад инсонлар пайдо бўлиб қолган. Ҳатто, Сирдарёдаги уйимнинг ҳам манзилини топиб борибди. Ундан кейин Тошкентдаги уйимга ҳам келди. Эшикни очмай, “Ким бу?” десам исмини айтиб, гапи борлигини айтяпти. Ҳайронман, у қулфли эшикни қандай очди? Энг ҳайратланарлиси, у оилам билан Умра сафарига борганимда ҳам худди ўша гуруҳ билан борган. Аэропортда телефонимнинг қуввати тугаб, бир муддат қувватлагич олдида турганман. Instagram саҳифасини кузатсам бир чеккада туриб, мени видеога олган ва тармоққа жойлаштирган. У ортимдан изма-из кузатган. Турфирма билан боғлансам, мен Instagram’га реклама жойлаган куним жой брон қилган экан. Унга нима керак, ҳайронман. Яқинда автотураргоҳда турсам бир йигит келиб, “Эшикни очинг” деб таъқиб қилганди. Ўйлаб қарасам бу воқеаларнинг бари бир-бирига узвий боғлиқдек туюляпти. Шу боис ака-укаларим билан бир уйда туришга қарор қилдим. Мени ёлғиз деб ўйлаётганлар адашади, — дейди актриса Феруза Норматова.
Муниса Ризаева: “Иккита қўриқчимни пичоқлашган”
— Тўйда қизиқарли воқеалар билан бирга хавфли вазиятлар ҳам бўлади. Чунки кимнинг нима мақсадда эканлигини билмайсиз. Кейинги пайтларда ёшлар орасида пичоқбозлик ҳолатлари кўпайиб кетган. Илгари йигитлар уришиш пайтда пичоқ чиқаришса, “Ўзинг уришолмайсанми?” деб мазах қилишарди. Ҳозир аксинча, олдида пичоқ олиб бориш обрўдек бўлиб қолган. Яхши ҳамки, бундай вазиятларнинг олдини оладиган, уларга қарши чора кўрадиган ички ишлар ходимлари бор. Икки марта қўриқчимни пичоқлашган.
Биттасининг оёқларига тиқилган пичоқни кўриб, қўрқиб кетганман. Яхшиямки, уларни тезда касалхонага олиб борганмиз. Бу ишни қилганлар эса тегишли тартибда жавобгарликка тортилган. Бундай вазиятларга кўп учраганим учун кўнглим бўлмаган тўйхонада қўшиқ куйламайман. Чунки кўнглим бўлмай кирган тўйхонада муштлашув ёки ҳеч бўлмаганда чироқ ўчиши билан боғлиқ вазият бўлади, — дейди хонанда Муниса Ризаева.
“Ғайрат Усмонов келмаса, ўзимни томдан ташлайман, деган”
— Тўйлар, концертлар билан боғлиқ қизиқарли воқеалар жуда кўп бўлади. Сизга энг кулгили ва энг қайғулисини айтиб бераман. Хуллас, воҳада хизматда эдик. Бир кундан кейин стадионда концерт беришимиз керак эди. Ашаддий мухлислардан бири бир кун аввал тунаб қолган меҳмонхонамизга бориб, “Ғайрат Усмонов билан учрашмоқчиман”, дебди. Меҳмонхона ходими кетганимни айтган. Аммо синглимиз гапига ишонмай, ходим билан жанжаллашган. Энг ёмони, меҳмонхона яқинидаги тўрт қаватли бинонинг томига чиқиб, “Ғайрат Усмонов келмаса, ўзимни шу ердан ташлайман”, деб таҳдид қилган.
Бақир-чақирдан кейин туман раҳбарлари ҳам ўша ерга боришган. Жаҳл отига минган мухлиса синглимизни тинчлантириш осон кечмаган. Эртаси кунги концертда олд қаторига ўтказиб, вазиятни юмшатганмиз. Кейинчалик билсам, у бир кун аввалги тўйда мен билан суратга тушолмаганининг аламидан шундай қилган экан.
Лола Аҳмедова: “У носоғлом инсон экан”
Бир неча йил аввал Лола Аҳмедованинг “ашаддий мухлиси” газеталарга мактуб йўллаб, уни чоп этмаса, судга бериш билан таҳдид қилар эди. Вазият шунчалик жиддийлашдики, у хонанданинг оиласи ҳақида ҳам бўҳтонлар ёзиб, тарқатди.
— Бу инсон билан рўбарў келдим. Суҳбатлашдим. Ўзимни кўрса, сен билан ишим йўқ, дейди. Лекин бунинг тагига етганимизда у кишининг руҳий носоғлом эканлигини аниқладик. Ёки бу иш кимгадир керакмикан? Буни вақт кўрсатади. Бу инсондан руҳий касалликлар шифохонасига жойлаштирганимиздан сўнггина қутулдик. У ҳақиқатан ҳам носоғлом, ноадекват инсон. У инсон менинг мухлисим бўлганида, тинчимни бузмасди. У туфайли анча овора бўлдим, асабларим бузилди. Прокуратура ходимларига мурожаат қилишга тўғри келди. У ачинишга лойиқ. Унинг онаси билан суҳбатлашишганида, “Ўғлим Лоланинг мухлиси, уни яхши кўради, мен ҳеч нарса қилолмайман” деган экан. У инсон 42 ёшида бўлишига қарамай, оила қурмаганлиги унинг руҳий носоғлом эканлигини тасдиқлайди, — дейди хонанда Лола Аҳмедова.
Анвар Санаев: “Судга бериб қутилдим”
— Аслида хонанда мухлислар учун ижод қилади, аммо бармоқлар баробар бўлмаганидек, фанатлар ҳам турлича бўлади. Эшигимнинг тагига келиб, “Анвар Санаевни кўрмагунча кетмайман”, деганлар ҳам бўлган. Уйда бўлсам улар билан учрашаман, аммо хизмат сафари билан кетганимни айтишса ҳам кетмай бир неча кунлаб кутганлар бўлган. Бир мухлиса қиз бўларди, “Менга уйланинг” деб хат ёзаверарди. Аввалига, буни шунчаки ҳазил деб ўйладим. Қарасам, бу таъқибга айланиб кетяпти. Охири уни судга беришга мажбур бўлдим. Мана шундан кейин тинчиди, — дейди хонанда Анвар Санаев.
Изоҳ (0)