Ўзбекистонда 65 нафар бола ўлимига сабаб бўлган “Док-1 Макс” дори воситаси бўйича суд иши бошлангани, мазкур жиноят ишида 21 нафар кишига нисбатан айблов эълон қилингани хабар берилганди. Жиноят ишлари бўйича Тошкент шаҳар суди қисқа танаффусдан сўнг суд мажлисини давом эттирмоқда. Бу ҳақда суд мажлисида иштирок этган “Дарё” мухбири хабар берди.
Суд аввалида судланувчи А.А.нинг адвокатлари — М.Мадаминов ҳамда А.Ҳусановлар “Qalampir.uz” сайти журналисти Ҳулкар Муртозоевани суд жараёнини ёритишда айбсизлик презумпциясига амал қилмаганликда айблаб, суддан четлатиш бўйича илтимоснома киритди.
Шунингдек, яна бир адвокат Илҳом Раҳматов “Kun.uz” нашрини ҳам айбсизлик презумпсиясига амал қилмаганликда айблади. Аммо нашр журналистларини суддан четлатишни сўрамади.
Суд мазкур илтимосномани рад этди. Аммо ОАВ вакилларига жараённи ёритишда айбсизлик презумпциясига амал қилишни сўради.
Судда, шунингдек, айбланувчи А.А.нинг адвокати судланувчига нисбатан қўлланилган қамоқ эҳтиёт чорасини бекор қилиб, унга қамоққа олиш билан боғлиқ бўлмаган эҳтиёт чораси қўлланилишини сўради. Суд ҳайъати мазкур илтимосномани ҳам рад этди.
Изоҳ (0)