Ўзбекистонда 65 нафар бола ўлимига сабабчи деб қаралаётган “Док-1 Макс” сиропи бўйича бошланган суд мажлиси қисқа танаффусдан сўнг, 16 август куни соат 10:00 да яна ўз ишини давом эттиргани ҳақида хабар берилганди. Навбатдаги суд мажлисида икки нафар айбланувчи — ҳиндистонлик С.Р.П. ва унинг ўринбосари сифатида ишлаган Б.Қ.лар сўроқ қилинди.
Судда сўроқ қилинган Quramax Medical МЧЖ директори С.Р.П. адвокатларнинг саволига жавоб берар экан, Marion Biotech PVТ. Ltd корхонасида инспексион текширув ўтказилишини тўхтатиш учун Ж.Э. исмли масъулга 33 минг доллар берганини тан олди.
Тергов ҳужжатларида қайд этилишича, Marion Biotech PVT. Ltd. корхонасининг “Кураракс 200”, “Кураракс 400” дори воситаси ҳам рўйхатдан ўтказилиб, Ўзбекистонда сотилиши режа қилинган. Бироқ дорини рўйхатдан ўтказиш ҳужжатлари “Док-1 Макс” ҳужжатлари сингари ишончсиз, тўлиқ бўлмаган ва нотариал тасдиқланмаган бўлгани учун корхонага инспекцион текширув тушиши режалаштирилган.
Marion Biotech Pvt. Ltd. корхонасининг “Кураракс 200”, “Кураракс 400” дори воситаси муҳокама қилинган экспертлар кенгашида ушбу дори воситасини ишлаб чиқариш шароитлари шубҳа остига олинган ва кенгаш аъзолари томонидан Marion Biotech Pvt. Ltd. корхонасида инспексион текширув ўтказилиши, дори воситасини рўйхатдан ўтказиш масаласи эса текширув натижасига кўра ҳал қилиниши ҳақида қарор қабул қилинган. Бу ҳақда кенгаш баённомасига тегишли қайдлар киритилиб, кейинчалик мажлисда иштирок этмаган С.Қ. томонидан тасдиқлаб берилган. Шундан сўнг давлат маркази томонидан 26 май куни “Зарур амалиётлар маркази” ДУКка Marion Biotech Pvt. Ltd. корхонасида инспексион текширув ўтказиш ҳақида ёзма топшириқ, корхонанинг ўзига эса бу ҳақда ёзма хабарнома юборилган, — дейилади айблов хулосасида.
Қайд этилишича, Marion Biotech Pvt. Ltd. корхонасида инспексион текширув ўтказиш белгиланганидан хабар топган корхонанинг норасмий раҳбари бошқа бир ҳиндистонлик Ж.С. Quramax Medical МЧЖ директори Р.С.П. ва жамиятнинг савдо директори Б.Қ.лар билан тил бириктириб, корхонанинг ишлаб чиқариш шароитлари белгиланган талабларга жавоб бермаслиги, текширув ўтказилган тақдирда мазкур камчиликлар юзага чиқиб, корхонанинг бошқа дори воситаларининг ҳам Ўзбекистонда рўйхатдан ўтказиш тақиқланиши ҳамда уларнинг импорти тўхтатилиши мумкинлигини тахмин қилган. Ва давлат маркази масъуллари орасидан инспексион текширувни бекор қилиш имкони бўлган ходимни топиш ҳаракатига тушган. Р.С.П. Quramax Medical МЧЖ рўйхатга олиш бўйича менежери Н.М.дан ёрдам сўраган. Шунда ходими унга давлат маркази рўйхатдан ўтказиш бўлимида бош мутахассис лавозимида ишловчи курсдоши Ж.Э.нинг телефон рақамини берган.
Р.С.П. жиноий шериклари Ж.С. ва Б.Қ.лар билан тузилган жиноий режасини амалга ошириш мақсадида Ж.Э. билан аввалига телефон орқали боғланиб, кейинроқ у билан ЖИБ Миробод туман суди яқинида жойлашган “B&B” кафесида кўришган. Суҳбат давомида Р.С.П. корхонага тайинланган инспексион текширувни бекор қилишда амалий ёрдам сўраб, бунинг учун моддий манфаат ваъда қилган. Шунда Ж.Э. унинг таклифини раҳбарларига етказиб, тез кунларда уларнинг жавобини маълум қилишини билдирган. Ж.Э. таклифни давлат маркази рўйхатдан ўтказиш бўлими бошлиғи Ш.Ш.га етказган. Масъул ушбу хизмат 45 минг доллар бўлишини айтган. Ҳиндистонлик тадбиркор уларга 33 минг доллар бера олишини билдирган. Ва айтилган пулни берган, — дейилади тергов ҳужжатларида.
Суд терговида ҳиндистонлик айбланувчи Р.С.П. текширувни тўхтатиш учун 33 минг доллар берилганини тан олди. Унинг ўринбосари ўзбекистонлик судланувчи Б.Қ. ҳам 33 минг доллар пул масъулларга берилганини, аммо нима мақсадда берилганидан бехабарлигини айтди.
Суд давомида, шунингдек, адвокатлар томонидан “Қалампир.уз” ва “Кун.уз” сайтлари айбсизлик презумпсиясига амал қилмаётганликда айбланди. “Газета.уз” нашрининг жонли эфири тўхтатиб қўйилди.
Суд 2023 йилнинг 18 август куни соат 10:00 га қадар танаффус эълон қилди.
Изоҳ (0)