“Док-1 Макс” иши: адвокатлар яна журналистларни суддан чиқариб юборишни талаб қилди. Судья нотўғри ахборотни журналистлар эмас, норасмий канал админлари тарқатаётганини билдирди

Ўзбекистонда 65 нафар боланинг ўлимига сабабчи деб қаралаётган “Док-1 Макс” иши бўйича суд мажлиси бошлангани ва 18 август кунига қадар танаффус эълон қилинганди. Суд қисқа танаффусдан сўнг ўз ишини давом эттирмоқда.

Суд аввалида айбланувчиларнинг адвокатлари яна бир бор ОАВ вакиллари фаолиятига эътироз билдириб, уларни суд залидан чиқариб юборишни сўради. Мазкур таклифни барча айбланувчиларнинг адвокатлари қўллаб-қувватлаб, мавзу доирасидаги хабарлар изоҳида адвокатлар шаънига тўғри келмайдиган гаплар ёзилаётганини айтиб, “буни тартибга олиш керак”, деди.

Судья Мусо Юсупов мазкур илтимосномага жавоб қайтарар экан “Бу каби нотўғри маълумотлар судда иштирок этмаганлар томонидан судда иштирок этган журналистлар ахборотини нотўғри талқин қилиниши оқибатида чиқиб кетмоқда. Шунга эътибор беришингизни ва адвокат сифатида шаъним, қадр-қимматим деган гапни айтмаслигингизни сўраган бўлардим. Боиси, Сиз айбланувчиларни ҳимоя қилиб, адвокатлик ишингизни бажаряпсиз. Айбланувчиларни Сиз ҳимоя қилмасангиз, давлат томонидан бериладиган адвокатлар ҳимоя қилади. Судда айбланувчиларнинг адвокати бўлиши шарт, боиси адвокат оқловни, прокурор эса қороловни амалга оширади. Шуни тушунмаётган юртдошларимизга шу ерда ўтирган расмий ОАВ вакиллари тўғри тушунтирасиз деган умиддамиз, — деди.

Судда иштирок этаётган адвокатларнинг таъкидлашича, ижтимоий тармоқларда, шунингдек, жабрланувчиларнинг айбланувчиларга ўлим жазосини сўрагани айтилган мақолалар ҳам эълон қилинмоқда. Адвокатларнинг эслатишича, Ўзбекистонда ўлим жазоси бекор қилинган бўлиб, бундай жазо тури йўқ.

Эслатиб ўтамиз, айрим Telegram каналларида “Дарё” интернет нашрида эълон қилинган “Ҳиндистонлик тадбиркор яна бир яроқсиз дорига рухсат олиш учун 33 минг доллар пора берган: “Док-1 Макс” ишини кўраётган суднинг навбатдаги мажлисидан репортаж” сарлавҳали мақолада келтирилган маълумотлар нотўғри талқин қилиниб, “65 та бола ўлишига сабаб Ҳиндистоннинг ‘Док-1 Макс’ сиропи учун 33 минг доллар пора берилган”, тарзида эълон қилинган. Сайт маълумотида аслида бу пул Quramax Medical МЧЖ директори С.Р.П. ва унинг ўринбосари томонидан Biotech PVT. Ltd корхонасида инспексион текширув ўтказилишини тўхтатиш ва бунинг наздида яна бир дорининг Ўзбекистонда сотилишига рухсат олиш мақсади ётгани билдирилганди.