Адвокатлар ҳиндистонликни қамоқдан олиб чиқишга уринди, жабрланувчилар бунга қарши чиқди: 65 нафар гўдак ўлимига сабаб бўлган “Док-1 Макс” сиропи бўйича бошланган суддан репортаж

Ўзбекистонда 65 нафар бола ўлимига сабаб бўлган “Док-1 Макс” сиропи бўйича суд иши бошланди. Суд соат 10:00 да бошланиши айтилса-да, қамоқ эҳтиёт чораси қўлланилган судланувчиларни суд биносига олиб келиш билан боғлиқ муаммо сабаб, икки соат кеч бошланди.

Суд аввалида 21 нафар судланувчининг шахсига аниқлик киритилди. Айбланувчиларнинг адвокатлари киритган илтимосномалар муҳокама қилинди.

Ҳиндистонлик С.Р.П. (Quramax Medical МЧЖ директори)нинг адвокати Даврон Аҳмадов суд ҳайъатидан ҳимояси остидаги айбланувчининг дини, вегетарианлигини инобатга олиб, унга нисбатан қўлланилган қамоқ эҳтиёт чорасини бекор қилишни, айбланувчига қамоққа олиш билан боғлиқ бўлмаган эҳтиёт чораси қўлланилишини сўради. Суд илтимосномани рад этди.

Яна бир адвокат ҳимояси остидаги Ш.Х.нинг соғлиғи билан боғлиқ муаммо сабаб, унинг судда онлайн иштирок этишига рухсат берилишини илтимос қилди. Суд ҳайъати Ш.Х.нинг соғлиғидаги муаммо билан боғлиқ жараён ҳақида ҳужжатга эгалигини, аммо шифокорларнинг судланувчининг соғлиғи судда иштирок этиши учун жавоб бермайди деган хулоса берса ва у судга тақдим қилинса, бу илтимоснома муҳокама қилинишини, шундан сўнг бу илтимоснома бўйича қарор қилинишини билдирди.

Суд 16 август соат 10:00 га қадар танаффус эълон қилди.

Мазкур сироп иши бўйича 21 киши айбланмоқда. Уларнинг 16 нафари эркак ва 5 нафари аёл бўлиб, 7 тасига қамоққа олиш, 12 тасига муносиб хулқ-атворда бўлиш тўғрисидаги тилхат ва 2 тасига гаров тарзидаги эҳтиёт чоралари қўлланган. Улар Жиноят кодексининг 184, 28,186-3, 186-3, 25,205, 205, 207, 28,209, 209, 210, 211, 212, 228-моддаларида назарда тутилган жиноятларни содир этганликда гумонланмоқда.

2022 йилнинг декабрь ойида тармоқларда Самарқанд шаҳридаги дорихоналардан харид қилинган “Док-1 Макс” таблетка ва сироп дори воситаларини қабул қилган беморларда турли ножўя таъсирлар кузатилгани ҳақида хабарлар тарқалди. Фармацевтика тармоғини ривожлантириш агентлиги ушбу вазиятни дарҳол назоратга олди. Заҳарли сироп ҳақида жамоатчиликка ошкор қилган Самарқанд вилояти Болалар кўп тармоқли тиббиёт маркази бош врачининг ёзишича, икки ойда 21 киши шу дори воситаси қабулидан сўнг шикоят қилган. 17 нафар боланинг аҳволи ўта оғир бўлиб, уларнинг 15 нафарида ўлим ҳолати кузатилган.

Шундан сўнг “Дори-дармон” акциядорлик жамияти ахборот хизмати Ўзбекистондаги дорихоналардан “Док-1 Макс” препаратини қайтариб олиш бошланганини маълум қилди. Кўп ўтмай Соғлиқни сақлаш вазирлиги “Док-1 Макс” препаратини ўрганиш натижаларини эълон қилди. Ҳолат юзасидан Соғлиқни сақлаш вазирлигининг тегишли буйруғига асосан махсус ишчи гуруҳ аъзолари томонидан жойига чиққан ҳолда хизмат текшируви ўтказилиб, жиноят аломатлари мавжудлиги аниқланиб, материаллар ҳуқуқни муҳофаза қилиш органларига юборилди.

Ўша куни Давлат хавфсизлик хизматининг Тергов бошқармаси томонидан Quramax Medical МЧЖ ҳамда “Дори воситаларини стандартлаштириш илмий маркази” МЧЖ мансабдор шахсларига нисбатан Жиноят кодексининг 186-3 моддаси 4-қисми “а” банди билан жиноят иши қўзғатилиб, гумонланувчи шахслар ДХХ Тергов ҳибсхонасига жойлаштирилди. Кейинчалик “Дарё” мухбири мазкур сироп сабаб Қашқадарёда 1,5 ёшли бола вафот этганини ошкор қилди. Шунингдек, Наманганда 2,5 ёшли бола шу сироп сабаб ўлди. ОАВларда эълон қилинган ахборотларга кўра, сироп сабаб дастлаб 22 нафар бола вафот этгани айтилган бўлса, Олий суд бу рақамлар икки баравар кўп эканини очиқлади.