Ўзбекистонда талабаларини давлат ОТМ талабалар турар жойига жойлаштириш бўйича давлат хизматлари кўрсатишнинг маъмурий регламенти тасдиқлангани тўғрисида хабар берилганди. Ҳужжат билан қайси тоифадаги талабалар устуворлик асосида талабалар турар жойларига қабул қилиниши ҳам белгиланган.
Булар:
- “Меҳрибонлик уйлари” тарбияланувчилари, етим ва ота-она қарамоғидан маҳрум бўлган талабалар;
- “Ижтимоий ҳимоя ягона реестри”, “темир дафтар” ва “аёллар дафтари”га киритилган ижтимоий ҳимояга муҳтож оилаларнинг фарзандлари ҳамда “ёшлар дафтари”да турадиган талабалар;
- I ва II гуруҳ ногиронлиги бўлган талабалар;
- бир оиладан бакалавриат босқичи кундузги таълим шаклида икки ёки ундан ортиқ тўлов-шартнома асосида ўқиётган оилалар фарзандлари;
- халқаро фан олимпиадалари, Олий таълим, фан ва инновациялар вазирлиги томонидан ўтказиладиган республика фан олимпиадаларида ғолибликни қўлга киритган талабалар;
- “Йил талабаси” ва “Талабалар театр студиялари” кўрик-танловларининг республика босқичи ғолиби бўлган талабалар;
- олий таълим муассасалари талабалари ўртасида ўтказилган “Заковат” интеллектуал ўйинининг республика босқичида ғолибликни қўлга киритган талабалар;
- талабалар турар жойида талабалар кенгаши раиси, қават сардори бўлган талабалар.
2023/2024-ўқув йилида:
- 1-курс талабалари учун давлат ОТМ талабалар турар жойига жойлашиш давлат хизмати марказлари ва “my.gov.uz” орқали бепул электрон ариза бериш йўли билан амалга оширилади. Аризалар 20 августдан қабул қилинади.
- 2-курс ва ундан юқори курс талабаларини талабалар турар жойига жойлаштириш анъанавий тарзда амалга оширилади.
Бунда ётоқхонага жойлашиш учун ариза ОТМ талабалар турар жойларига жойлаштириш комиссиясига 2023 йил 25 августгача топширилади. 2024/2025-ўқув йилидан барча курс талабалари учун давлат ОТМ ётоқхонасига жойлашиш онлайн амалга оширилади.
Март ойида Ўзбекистонда 2023 йил якунига қадар 18 минг ўринли талабалар турар жойлари қурилиб, фойдаланишга топширилиши тўғрисида хабар берилганди. Ўшанда йил якунига қадар талабалар турар жойи фондини 127 минг ўриндан ошириш режалаштирилгани айтилган эди.
Изоҳ (0)