Ғарб давлатлари Ливия собиқ раҳбари Муаммар Каддафининг ўлдирилишига “рухсат бериб”, ўта жиддий хатога йўл қўйган, деб ҳисоблайди Италия ташқи ишлар вазири Антонио Таяни.
“Ҳа у демократия курашчиси бўлмагандир, аммо унинг ўлдирилиши биланоқ Ливия ва умуман Африкада сиёсий беқарорлик юзага келди”, — деди италиялик вазир.
У аввал ҳам Ғарб давлатларининг Ливияга нисбатан сиёсатини танқид қилганди. Масалан, 2019 йилда ўша пайтда Европарламент президенти бўлган Таяни Каддафини ағдаришда Франция ва Буюк Британиянинг ролини тилга олган ва буни тартибсизликларга сабаб бўлган хато, деб айтганди. Яна бир даврада Таяни Каддафининг ўлдирилиши миграция инқирозига, террорчи ташкилотларнинг кучайишига ҳисса қўшганини таъкидлаган.
Каддафи ўлдирилгач, Ливияда ҳокимият бўлиниб кетди
Ливияни 42 йил бошқарган Каддафи 2011 йилда ҳокимиятдан четлаштирилган — унинг рақиблари НАТО томонидан қўллаб-қувватланган Ўтиш даври миллий кенгашини тузиб, уни мамлакатдаги қонуний ҳокимият деб эълон қилган. 2011 йил 20-октябрда Каддафи Сирт шаҳри яқинида ўлдирилди.
2010 йилда Каддафи Европа Иттифоқини Африка давлатларидан ноқонуний миграцияга қарши курашиш учун ҳар йили 5 миллиард евро ажратишга чақирган, акс ҳолда “Европа Африкага айланиши мумкинлигидан” огоҳлантирганди.
2011 йилда Каддафи ағдарилганидан сўнг Ливияда ҳокимият рақиб кучлар ўртасида бўлиниб кетди. Бирлашган Миллатлар Ташкилоти томонидан тан олинган Миллий келишув ҳукумати Триполида жойлашган, мамлакатнинг жанубий ва шарқий ҳудудлари эса Ливия Миллий армияси бош қўмондони Халифа Хафтар кучлари назорати остида қолган. БМТ раҳбарлигидаги музокаралардан сўнг урушаётган томонлар доимий ўт очишни тўхтатиш бўйича келишувни имзолади. Мамлакатда президентлик сайловлари 2021 йилда бўлиб ўтиши керак эди, бироқ улар ўтказилмади, чунки умумхалқ сайловининг ҳуқуқий асосини ташкил этувчи қонун борасида келишиб олинмади.
Изоҳ (0)