Ливия ва Яман собиқ президентлари Муаммар Каддафи ҳамда Абдуллоҳ Салоҳ Ироқ собиқ президенти Саддам Ҳусайннинг ҳимояси учун адвокатлар қўмитасини молийлаштиришга маблағ ажратиб келган. Бу ҳақда Ҳусайннинг адвокати Бушра Халилга таяниб, «РИА Новости» хабар берди.
АҚШ бошчилигидаги халқаро коалициянинг Ироққа бостириб кириши 2003 йилда содир бўлган. Халқаро терроризмга қарши кураш ва оммавий қирғин қуролларини излаш баҳонасида президент Саддам Ҳусайн ҳокимиятдан ағдарилган ва 2006 йилнинг 30 декабрда қатл этилган.
«Қўмита харажатларига келадиган бўлсак, президент Каддафи Рагед хонимга пул хайрия қилган, чунки у қўмитанинг Аммандаги офисида ишларди. Президент Али Абдуллоҳ Салоҳ ҳам пул хайрия қилган», — дейди Халил.
Рагед Саддам Ҳусайн ўлдирилган Ироқ етакчисининг қизи бўлиб, мамлакатда АҚШ ҳарбий кампанияси бошлангач, Иорданияга кўчиб ўтган ва отасининг манфаатларини суд жараёнида ҳимоя қилган адвокатлар қўмитасини мувофиқлаштирган.
«Аммандан Бағдодга парвоз чипталарини Рагед хоним таъминларди, қолганлар ҳам ўз мамлакатидан унинг ҳисобидан учиб келар эди, меҳмонхоналар қўмита бюджетидан қопланган», — дея қўшимча қилади адвокат.
Ироқнинг собиқ раҳбари қарийб олти ой давомида америкаликлардан яширинишга муваффақ бўлган, бироқ 2003 йилнинг декабрида у ўзи туғилган шаҳар — Тикрит яқинида қўлга олинган. Махсус трибуналнинг биринчи йиғилиши 2004 йил июль ойида бўлиб ўтди. Суд Ҳусайнни айбдор деб топган ва 2006 йилнинг 5 ноябрида осиб ўлдиришга ҳукм қилган.
Изоҳ (0)