Украина Қуролли кучлари Ҳарбий-ҳаво кучлари қўмондонлиги матбуот котиби Юрий Игнатнинг айтишича, Украина келаётган кузда ҳам, қишда ҳам иттифоқчилардан Американинг F-16 қирувчиларини олишга муваффақ бўлмайди.
“Бу йил куз ва қишда Украинани F-16 самолётлари билан ҳимоя қила олмаслигимиз аллақачон аниқ бўлиб турибди”, — деди у миллий телемарафон эфирида.
Унинг сўзларига кўра, ушбу қирувчилардан умид катта эди, чунки улар мамлакат ҳаво мудофаасининг бир қисмига айланиб, Россия ракеталаридан ҳимояланишда ёрдам бериши мумкин эди.
“Аммо, улар бўлмаганидан кейин, масала жойидан силжиди. Учувчиларимиз яқин орада (қирувчиларни бошқаришга) ўргатилишини биламиз. Аммо ҳаво ҳужумидан мудофаани ҳам кучайтиришимиз керак”, — дея Игнатнинг сўзларини келтиради “РБК-Украина”.
Украина Ғарбдан F-16 қирувчиларини сўраяпти
2023 йил бошидан бери Украина ҳукумати Ғарб давлатларидан Украинага замонавий қирувчилар, жумладан, Американинг F-16 самолётларини етказиб беришни фаол сўрамоқда. Июль ойида АҚШ Миллий хавфсизлик кенгашининг стратегик алоқалар бўйича координатори Жон Кирби Украина бундай самолётларни йил охиригача олиши мумкинлигини айтганди.
Аввал Politico Дания ва Нидерландия бошчилигидаги 11 давлатдан иборат коалиция украиналик учувчиларга F-16 да учишни ўргатишга тайёрлигини, бироқ АҚШнинг расмий рухсатисиз буни амалга ошира олмаслигини хабар қилди. 8 август куни Пентагон АҚШ президенти Жо Байден бошқа давлатлар вакилларига украиналик учувчиларни ўқитишга рухсат берганини маълум қилди.
Ҳарбий экспертларнинг Тhе Economist нашрига ёзган мақоласида F-16 қирувчи самолётлари Украина армиясига фронтда тезкор муваффақиятга эришишга ёрдам бермаслиги айтилди.
Изоҳ (0)