Украинада 45 мингга яқин москвалик жанг қилмоқда, деди Москва мэри Сергей Собянин “Территория смислов” форумида.
“Бугун махсус ҳарбий операция зонасида 45 минг москвалик жанг қилмоқда. Улар жанг ҳудудида бўлиб турганларнинг муҳим қисмини ташкил этади”, — дея Собяниннинг сўзларини келтиради “Интерфакс”.
Шаҳар мэрининг таъкидлашича, гап 20 минг сафарбар қилинган ҳарбий хизматчилар, 20 минг шартномаси асосидаги аскар ва “кўнгиллилар” ҳақида кетмоқда.
“Қанча профессионал ҳарбий кетганини билмайман, лекин менимча, улар камида беш минг”, — дея қўшимча қилди у.
Уч ҳафта аввал, 26 июль-куни Собянин Украинада 30 мингга яқин москвалик жанг қилаётганини айтганди. Унга кўра, шулардан 10 минг нафари шартнома асосида хизмат кўрсатиш учун рўйхатдан ўтган, яна 20 минг нафари сафарбар этилганлар.
Россияда сафарбарлик ҳақидаги қонун ҳалиям ўз кучида
Россияда сафарбарлик 2022 йил сентябрь ойининг охирида бошланди. Октябрь ойи охирида Мудофаа вазирлиги ҳарбий хизматга чақирув тугагани ҳақида хабар берди. Мудофаа вазири Сергей Шойгуга кўра, ўшанда 300 минг киши сафарбар қилинган. Шундан бери Россия ҳукумати Россияда сафарбарлик якунланганини бир неча бор таъкидлаган, аммо 2023 йил январь ойида Россия президентининг матбуот котиби Дмитрий Песков сафарбарлик фармони амал қилишда давом этишини тасдиқлади, чунки, унга кўра, сафарбарлик ҳарбий хизматга чақиришдан ташқари “бошқа тадбирларни ҳам ўз ичига олади”.
2023 йил апрель ойида Россияда ҳарбий хизматга мажбур бўлган шахслар реестри ва онлайн чақирувлар тўғрисидаги қонун қабул қилинди, июль ойида эса Россия ҳукумати ҳарбий хизмат тўғрисидаги қонунчиликни кучайтирувчи ҳужжатлар тўпламини тасдиқлади. Бошқа нарсалар қаторида, Россия ҳарбий хизматга чақириш ёшини кенгайтирди, шунингдек, захирада қолиш муддатини оширди. Бундан ташқари, муддатли ҳарбий хизматни ўтаётган аскарларга чақирув қоғози топширилган пайтдан бошлаб хорижга чиқиш тақиқланди, ҳарбий хизматга келмаганлик учун жарима миқдори бир неча баробар оширилди.
Изоҳ (0)