Қайси ҳудудда 1-синфга қабул қилинган ўқувчилар сони энг кўп бўлгани очиқланди

Ҳозиргача энг кўп ўқувчи Самарқанддаги, энг кам ўқувчи Сирдарёдаги мактабларга қабул қилинди.

Жорий йилнинг 15 август ҳолатига Ўзбекистондаги мактабларга жами 660 983 нафар ўқувчи қабул қилинди. Бу ҳақда Мактабгача ва мактаб таълими вазирлиги ахборот хизмати “Дарё”га  маълум қилди.

Ҳисоб-китобларга қараганда, ҳудудлар бўйича энг кўп — 79 987 нафар ўқувчи Самарқанд вилоятидаги мактабларга қабул қилинган. Нисбатан кўпроқ ўқувчилар Фарғона (72 012 нафар), Қашқадарё (69 040 нафар) ва Андижон (60 866 нафар) вилоятларидаги мактабларга олинган. 

Энг кам ўқувчи Сирдарё (15 831 нафар) ва Навоий (19 417 нафар) вилоятларидаги мактабларга қабул қилинган.

Вазирлик ахборотига кўра, 2023/2024-ўқув йилида республика бўйича 730 000 нафардан ортиқ мактаб ёшидаги болаларни 1-синфга қабул қилиш режалаштирилган.  

Маълумот учун, айни пайтда Ўзбекистонда 10 минг 296 та мактаб фаолият юритмоқда. Янги ўқув йилига, 1-синфга қабул жараёнлари 20 июндан бошланган. Республикадаги 43 та туман ва шаҳарлардаги мактабларга қабул давом этмоқда.