“Ўзбекнефтгаз” АЖга қарашли UNG Petro автомобилларга ёнилғи қуйиш шохобчаларида Аи-92 бензинининг нархи 8600 сўмдан 9200 сўмга оширилди. Компаниянинг маълум қилишича, нарх кўтарилиши баҳордан бери амал қилиб келган чегирма якунлангани билан боғлиқ.
Жорий йилнинг март ойида баҳорги чегирма эълон қилиниб, UNG Petro АЁҚШларидаги Аи-92 маркали бензин нархи 9200 сўмдан 7 500 сўмга пасайтирилганди. “Ўзбекнефтгаз”АЖ мазкур чегирма фақат чекланган муддатда амал қилишини билдирган.
Август ойи бошида мазкур маркадаги бензин нархи 8 600 сўмга кўтарилди. Бугун (16 август куни) эса UNG Petro заправкаларида Аи-92 бензинининг 1 литри 9200 сўмдан сотилмоқда.
“Қиш ойларида Аи-92 бензинининг литри 9200 сўм бўлган. Баҳорги акция доирасида нарх 7500 сўмга туширилганди. Ҳозирда акция тугаб, нархлар яна жойига қайтди”, — дея “Дарё”га маълум қилди компания вакилларидан бири.
Эслатиб ўтамиз, апрель ойида Энергетика вазирлиги кўрилаётган чоралар натижасида Аи-92 маркали автобензин нархи май ойида 7500 сўмдан ҳам арзонлашиши кутилаётганини билдирганди.
“Ўзбекнефтгаз” департамент бошлиғи Жамшид Багиров “Дарё” мухбири билан суҳбатда компанияга қарашли АЁҚШлар сони республикадаги жами заправкаларнинг 3 фоизини ташкил этишини айтган.
Республикада 2500 та атрофида АЁҚШлар бўлса, шундан “Ўзбекнефтгаз”га тегишлилари атиги 70 та, холос. Бу умумий ҳисобда 2-3 фоизни ташкил қилади, — деган компания вакили.
Изоҳ (0)