Qaysi hududda 1-sinfga qabul qilingan o‘quvchilar soni eng ko‘p bo‘lgani ochiqlandi

Hozirgacha eng ko‘p o‘quvchi Samarqanddagi, eng kam o‘quvchi Sirdaryodagi maktablarga qabul qilindi.

Joriy yilning 15-avgust holatiga O‘zbekistondagi maktablarga jami 660 983 nafar o‘quvchi qabul qilindi. Bu haqda Maktabgacha va maktab taʼlimi vazirligi axborot xizmati “Daryo”ga  maʼlum qildi.

Hisob-kitoblarga qaraganda, hududlar bo‘yicha eng ko‘p — 79 987 nafar o‘quvchi Samarqand viloyatidagi maktablarga qabul qilingan. Nisbatan ko‘proq o‘quvchilar Farg‘ona (72 012 nafar), Qashqadaryo (69 040 nafar) va Andijon (60 866 nafar) viloyatlaridagi maktablarga olingan. 

Eng kam o‘quvchi Sirdaryo (15 831 nafar) va Navoiy (19 417 nafar) viloyatlaridagi maktablarga qabul qilingan.

Vazirlik axborotiga ko‘ra, 2023/2024-o‘quv yilida respublika bo‘yicha 730 000 nafardan ortiq maktab yoshidagi bolalarni 1-sinfga qabul qilish rejalashtirilgan.  

Maʼlumot uchun, ayni paytda O‘zbekistonda 10 ming 296 ta maktab faoliyat yuritmoqda. Yangi o‘quv yiliga, 1-sinfga qabul jarayonlari 20-iyundan boshlangan. Respublikadagi 43 ta tuman va shaharlardagi maktablarga qabul davom etmoqda.