Коррупцияга қарши курашиш агентлиги фоторадарлар ва интеллектуал кузатув камераларига оид очиқ маълумотларни таҳлил қилди. Бу ҳақда агентлик матбуот хизмати хабар берди.
Президентнинг 2021 йил 16 июндаги фармони билан тасдиқланган Очиқ маълумотлар сифатида жойлаштирилиши керак бўлган ижтимоий аҳамиятга молик маълумотлар рўйхатига мувофиқ, махсус автоматлаштирилган фото ва видео қайд этиш дастурий-техник воситалари ўрнатилган аниқ манзиллар, индивидуал тартибда ҳар бир дастурий-техник воситаси қайд этадиган йўл ҳаракати қоидалари бузилиши тури тўғрисидаги маълумотлар очиқ эълон қилиниши белгиланган.
Шунга кўра, ИИВ томонидан 25 июль ҳолатига кўра республика ҳудудида ишга туширилган онлайн фоторадар ва интеллектуал режимда ишловчи камералар тўғрисида эълон қилинган маълумот агентлик томонидан таҳлил қилинди.
Маълум бўлишича, бугунги кунда республика бўйича жами 746 та онлайн режимида ишловчи фоторадар ва интеллектуал режимида ишловчи камералар ишга туширилган.
Шунингдек, фоторадарлар ва интеллектуал режимида ишловчи камераларнинг 23 таси йўл ҳаракати қоидаларига риоя этилишини назорат қилувчи, 723 таси рухсат этилган ҳаракатланиш тезлигига ҳамда йўл ҳаракати қоидаларига риоя этилишини назорат қилишга мўлжалланган стационар радарларни ташкил этади.
Батафсил маълумотлар билан ушбу ҳавола орқали танишиш мумкин.
Изоҳ (0)