Ўзбекистон ҳарбий судига раис тайинланди ва икки судья ёзма аризасига асосан лавозимидан олинди

Ўзбекистон президентининг фармойиши билан ҳарбий суд ва айрим вилоят судларига раислар тайинланди, деб хабар беради Судьялар олий кенгаши.

Садриддин Эшонқулов судьялик ваколати муддати даврига Ўзбекистон Ҳарбий судининг раиси лавозимига тайинланди.

Шунингдек:

• Абдуҳалим Аҳмедов — судьялик ваколати муддати даврига Бухоро вилояти маъмурий судининг раиси лавозимига;
• Тўрабек Қодирқулов — судьялик ваколати муддати даврининг беш йил муддатига Сирдарё вилояти маъмурий судининг раиси лавозимига;
• Ғолибжон Давлатов — судьялик ваколати муддати даврига Қашқадарё вилояти маъмурий судининг раиси лавозимига;
• Алишер Абдураҳмонов — судьялик ваколати муддати даврининг беш йил муддатига Фарғона вилоят суди раисининг ўринбосари – иқтисодий ишлар бўйича судлов ҳайъати раиси лавозимига тайинланди.

Бундан ташқари, Ўзбекистон президентининг фармойиши билан ёзма аризаларига асосан, Бухоро вилоят маъмурий судининг раиси С.Турсунов ва Фарғона вилоят суди раисининг ўринбосари — иқтисодий ишлар бўйича судлов ҳайъати раиси А.Мадаминов эгаллаб турган лавозимларидан озод этилди.

Бундан олдин Ўзбекистонда 6 нафар судья лавозимида ўзгариш рўй бергани, Қашқадарёда фуқаро ногиронлик нафақасини ололмай қолганига сабаб бўлган судьяга чора кўрилгани, Судьялар олий кенгашида бир қатор янги тайинловлар амалга оширилгани тўғрисида хабар берилганди.