Иқтисодиёт ва молия вазирлиги “Фуқаролар учун бюджет” нашрининг давлат бюджетининг 2022 йил ижросига оид сонини эълон қилди. Унда Ўзбекистонда ҳудудлар кесимида жами оилалар ҳамда нафақа ва моддий ёрдам олган оилалар сони келтирилган.
Мамлакатда 2022 йилда ижтимоий ҳимоя учун қилинган харажатлар миқдори 19,4 триллион сўмни ташкил этган. Бу 2021 йилга нисбатан 78,3 фоизга ёки 8,5 триллион сўмга кўп дегани.
“Ижтимоий харажатларнинг ошиши ижтимоий нафақа тўланган оилалар сонининг ошиши ва ижтимоий ҳимояга муҳтож оилаларга бир марталик моддий ёрдам кўрсатилиши билан боғлиқ”, — дея маълум қилган вазирлик.
Ўзбекистонда 2022 йилда қарийб 2,1 миллион оилага жами 11,4 триллион сўм нафақа пули тўланган. Таққослаш учун, 2021 йилда 1,2 миллион оилага 6 триллион сўм нафақа ажратилган.
Ўтган йили нафақа олувчи оилалар сони энг кўп ҳудуд Қашқадарё вилояти бўлган. Вилоятда жами 823 минг 456 та оила мавжуд бўлиб, шундан 270,7 мингтасига нафақа пуллари берилган.
Шунингдек, нафақа олувчи оилалар сони нисбатан юқори ҳудудлар Самарқанд (248 минг 359 та оила) ва Наманган (247 минг 347 та оила) вилоятлари бўлган.
Энг кам нафақа олган оилалар сони Тошкент шаҳрида қайд этилган бўлиб, пойтахтдаги 33 мингта оилага нафақа пуллари тўланган. Шаҳардаги жами оилалар сони эса 861 минг 667 тани ташкил этган. Яна нисбатан кам оилалари нафақа олган ҳудудлар Навоий (47 минг 988 оила) ва Сирдарё (56 минг 867 оила) вилоятлари бўлган.
Изоҳ (0)