“Давлат пенсияларини тўлаш жараёнига замонавий ахборот технологияларини кенг жорий этиш орқали аҳолига кўрсатилаётган хизматлар сифатини оширишга қаратилган қўшимча чора-тадбирлар тўғрисида”ги ҳукумат қарори лойиҳаси эълон қилинди.
Ҳужжатга кўра, 2023 йил 1 ноябрдан “Халқ банки” сайёр кассалари томонидан махсус планшетларда фуқаролар бармоқ изи маълумотларини Адлия вазирлиги ҳузуридаги Personaллаштириш агентлигига электрон сўров юбориш орқали ўзаро мос келгани тасдиқланганидан сўнг нақд пул шаклида пенсия ва нафақа тўлаш тизими жорий этилади.
Республиканинг тоғли ва олис ҳудудларида интернет тезлиги ёки бошқа муаммолар сабабли пенсия олувчининг бармоқ изларини электрон шаклда солиштириш имконияти бўлмаганда ҳамда ўрнатилган тартибда расмийлаштирилган ишончнома орқали бошқа шахсга тўланаётганда нақд пул шаклда пенсия ва нафақалар тўлов қайдномаларини имзолаш орқали амалга оширилади.
Рақамли технологиялар вазирлиги, Адлия вазирлиги ва “Киберхавфсизлик маркази” давлат унитар корхонаси Марказий банк билан ҳамкорликда:
- Personaллаштириш агентлиги ва акциядорлик тижорат “Халқ банки” ахборот тизимлари ўзаро интеграция қилади;
- “Халқ банки” томонидан пенсия ва нафақа олувчиларнинг бармоқ изи электрон маълумотларини солиштириш имконияти мавжуд махсус планшетларни харид қилишга амалий ёрдам кўрсатади.
Қайд этилишича, бундай ўзгаришлар фуқароларга пенсия тўлашда ортиқча бюрократик тўсиқларни бартараф этиш, аҳолига қўшимча қулайликлар яратиш ҳамда маблағларни манзилли ва мақсадли сарфланишини таъминлаш мақсадида жорий этилади
Соҳага илғор ахборот-коммуникация технологияларини жалб қилиш орқали пенсия тўлашда инсон омилини камайтириш ҳамда фуқароларга кўрсатилаётган давлат хизматлари сифатини янада оширишга эришилади.
Изоҳ (0)