Iqtisodiyot va moliya vazirligi “Fuqarolar uchun budjet” nashrining davlat budjetining 2022-yil ijrosiga oid sonini eʼlon qildi. Unda O‘zbekistonda hududlar kesimida jami oilalar hamda nafaqa va moddiy yordam olgan oilalar soni keltirilgan.
Mamlakatda 2022-yilda ijtimoiy himoya uchun qilingan xarajatlar miqdori 19,4 trillion so‘mni tashkil etgan. Bu 2021-yilga nisbatan 78,3 foizga yoki 8,5 trillion so‘mga ko‘p degani.
“Ijtimoiy xarajatlarning oshishi ijtimoiy nafaqa to‘langan oilalar sonining oshishi va ijtimoiy himoyaga muhtoj oilalarga bir martalik moddiy yordam ko‘rsatilishi bilan bog‘liq”, — deya maʼlum qilgan vazirlik.
O‘zbekistonda 2022-yilda qariyb 2,1 million oilaga jami 11,4 trillion so‘m nafaqa puli to‘langan. Taqqoslash uchun, 2021-yilda 1,2 million oilaga 6 trillion so‘m nafaqa ajratilgan.
O‘tgan yili nafaqa oluvchi oilalar soni eng ko‘p hudud Qashqadaryo viloyati bo‘lgan. Viloyatda jami 823 ming 456 ta oila mavjud bo‘lib, shundan 270,7 mingtasiga nafaqa pullari berilgan.
Shuningdek, nafaqa oluvchi oilalar soni nisbatan yuqori hududlar Samarqand (248 ming 359 ta oila) va Namangan (247 ming 347 ta oila) viloyatlari bo‘lgan.
Eng kam nafaqa olgan oilalar soni Toshkent shahrida qayd etilgan bo‘lib, poytaxtdagi 33 mingta oilaga nafaqa pullari to‘langan. Shahardagi jami oilalar soni esa 861 ming 667 tani tashkil etgan. Yana nisbatan kam oilalari nafaqa olgan hududlar Navoiy (47 ming 988 oila) va Sirdaryo (56 ming 867 oila) viloyatlari bo‘lgan.
Izoh (0)