Андижонда ёрдам сўрашдан чарчаган ўқитувчилар қўлига ғишт олиб, мактаб учун қўшимча бино қурмоқда (фото)

Тармоқларда Андижон вилоятининг Асака туманидаги 54-умумтаълим мактаби ўқитувчилари таътил вақтида дам олиш ўрнига ўзлари учун ҳашар йўли билан қўшимча бино қураётгани айтилган хабарлар тарқалди. “Дарё” мухбири мазкур мурожаатни ўрганиш мақсадида Асака туманида бўлди.

Маълум бўлишича, мактаб биноси ўтган асрнинг 70 йилларида қурилган бўлиб, дастлаб болалар боғчаси сифатида фаолият юритган. 1998 йилдан мактабга айлантирилган. Бино икки қаватдан иборат бўлиб, 210 ўринга мўлжалланган. Бироқ ҳозирда муассасада 2 сменада 450 нафарга яқин бола таҳсил олади. Уларга 30 нафар педагог ходим таълим-тарбия бериб келмоқда. Таълим масканида 10 синфхона мавжуд бўлиб, дарс машғулотлари 9 та хонада олиб борилади. Қолган бир хона раҳбарият учун ажратилган.

Мактабнинг биология фани ўқитувчиси Шоҳидахон Содиқованинг айтишича, мактабда нафақат қўшимча бинога, ўқитувчилар хонасига ҳам эҳтиёж бор. Шу сабабли жамоа келишиб қурилиш ишларини бошлаб юборган.

Қўшимча бинога эҳтиёжимиз бор, ўқитувчилар хонаси йўқ. Куни кеча авария ҳолатдаги хонани бузиб ташлаб, ўзимизга хона қуришни бошладик. Тўгараклар ўт дейишади, шароит йўқ бўлса қаердан ўтамиз? Ҳатто немис тили, инглиз тили фанларини бўлиб ўтишга ҳам имконимиз йўқ. Атрофга қарасангиз тадбиркорлар мактаб ҳудудигача кириб келган, 27 йил ичида ҳокимлар чиқариб берган қарорлар билан йўқ жойдан бинолар пайдо бўлиб, мактаб ҳудудини ўраб олишди. Бир томондан эса маҳалла кириб келган.

Ўқитувчиларимиз информатика дарслари бўлмаган пайт ўша ерга кириб ёки коридорда ўтиради. Дарсдан дарсга қадар коридорга қўйилган икки-учта партада ўқувчиларнинг дафтарларини текширишга мажбур. Неча йилдирки, муаммоларни айтиб мурожаат қиламиз. Ўрганган киши бўлиб келишади, дастурга туширамиз деб қайтиб кетишади. Аммо натижа йўқ. Охири жамоа келишиб, директоримиз бошчилигида шу эски бинони бузиб, қурилишни бошладик. Бир ой ичида битказсак, янги ўқув йилидан ўша ерда ўтирмоқчи эдик, — дейди биология фани ўқитувчиси Шоҳидахон Содиқова.

Моҳидилхон Турғунова эса устозларнинг ҳокимият вакиллари эътиборсизлигидан ҳафсаласи пир бўлганини билдириб, президентдан муаммони ҳал қилишда ёрдам сўраган.

Шу мактабда 25 йилдан бери ишлайман. Иккинчи уйимдек бўлиб қолган. Биз ҳам бошқа мактаблардаги каби ўқувчиларимизга тўгарак ўтишни хоҳлаймиз. Шароит бўлмаса ҳам имкон қадар ўтяпмиз. Аммо шароит йўқлиги шижоатимизни сўндирмоқда. Ишонасизми мактабга биров келадиган бўлса дарвозадан бу ёғига олиб киргани хижолат бўламиз.

Шаҳарни ўртасида жойлашганимиз учун баъзи вақтларда шунақа ўксиниб кетамиз, кўнглимиз тўлиб йиғлагимиз келади, руҳиятимизга тасир қилади. Беш йилдан бери мана шу ер бузилган ҳолатида турибди. Ҳеч ким эътибор қилмаяпти. Фурсатдан фойдаланиб, биз вилоят ҳокими ва президентимиздан, ҳамма тегишли раҳбарлардан қўлимизни кўксимизга қўйиб илтимос қиламиз, бизга ва ўқувчиларимизга ёрдам беринг”, — дейди ўқитувчи Моҳидил Турғунова.

Яна бир ўқитувчи мактаб ҳудудидаги томлар очиқлиги, тадбиркорларга тегишли бинодаги электр симлар осиғлиқ туришидан шикоят қилмоқда.

Кўриб турибсизлар, мактабимиз харобага айланиб қолган. Дарс жараёнларида бирорта ўқувчи эшикка чиқиб келишни сўраса, уларга жавоб бергани ҳам хавфсираймиз. Тўғридаги томлар очиқ, тадбиркорларга тегишли бинодаги электр симлар осиғлиқ турибди. Танаффусни биз кейинги дарсга тайёргарлик кўриш билан эмас, болаларни назорат қилиш билан ўтказамиз. Дарсдан чиқиб, иккита ўқитувчи коридорда турса қолганлар атрофда айланиб, ўқувчиларни назорат қилишга мажбурмиз. Биз дарс ўтайликми ёки ўқувчини назорат қилайлик. Биздан таълим сифатини талаб қилаётганлар бизга аввало озгина шароит яратиб беришса, хурсанд бўлардик. Бунақа шароитда ҳар қандай ўқитувчи ҳам натижа кўрсатмаслиги аниқ, — дейди ўқитувчилардан яна бири.

Асака туман мактабгача ва мактаб таълими бўлими бошлиғи Турсуной Газибаеванинг айтишича, мактаб бундан анча йиллар аввал қайсидир дастурга тушган, бироқ турли сабабларга кўра бошланган ишлар тўхтаб қолган.

Мактабда бошланган қурилиш жараёнларидан хабаримиз йўқ эди. Эшитибоқ келиб мактаб директори ва жамоаси билан гаплашдик, шунингдек халқ таълими давридаги маълумотларни ўргандик. Ўрганишимиз давомида мактабга қўшимча бино қуриш бўйича икки марта таклиф берилганлиги, беш-олти йил аввал қайсидир дастурга тушиб, спорт зали қуриш бўйича ишлар бошланиб турли сабабларга кўра тўхтаб қолганлиги аниқланди. Сўнгги етти йил давомида таклифлар берилган бўлса-да, негадир мактаб ҳеч қайси дастурга тушмаган.

Туманда шу масалага масъул раҳбар сифатида ўз олдимга ушбу мактабни келаётган йилда тасдиқланадиган дастурларга туширишни мақсад қилиб қўйдим. Қанақа имкониятим бўлса барчасидан фойдаланишга ҳаракат қиламан. Ҳозир биринчи қиладиган ишимиз мактаб ҳолатини ўзгартирамиз, яхшироқ шароит қилиб, янги ўқув йилига тайёрлаймиз, — дейди Турсуной Газибаева.

“Дарё” воқеалар ривожини кузатишда давом этади.