Чеченистон пойтахти Грозний ва ўзини ўзи республика деб эълон қилган Донецк халқ республикасидаги Мариупол биродар-шаҳарларга айланди. Тегишли келишув Грозний мери Хас-Магомед Қодиров ҳамда Россия томонидан тайинланган Мариупол маъмурияти раҳбари Олег Моргун ўртасида имзоланди.
Чеченистон раҳбари сайтида хабар қилинишича, келишув Мариуполда Чеченистон ҳукумати аъзоларининг Донбассга ишчи сафари чоғида имзоланган. Битим савдо-иқтисодий, илмий-техникавий, ижтимоий ва маданий соҳалардаги ҳамкорликни назарда тутади.
Чеченистон ҳукумати хабарида келтирилган ДХР раҳбари Денис Пушилиннинг сўзларига кўра, “уруш оқибатларини бартараф этиш бўйича Чеченистон тажрибаси ДХРда аллақачон қўлланяпти ҳамда уй-жой коммунал хўжалиги, йўллар, ижтимоий аҳамиятга эга объектлар қурилиши каби соҳаларда ижобий натижалар кўрсатмоқда”.
“Грознийни тиклаш қай суръатда амалга оширилгани эсимизда, шунинг учун аҳоли пунктларини тиклаш нуқтаи назаридан республиканинг барча фойдали тажрибаси биз учун жуда муҳимдир”, — деган Пушилин.
Мариупол Россия қўшинлари томонидан Украинага кенг кўламли босқин бошида эгалланган эди. Шаҳар 2022 йилнинг май ойидан бери Россия назорати остида. Мариупол учун жанглар пайтида, юридик органларнинг маълумотларига кўра, тураржой биноларининг 90 фоизи вайрон бўлган. Улардан баъзиларининг ўрнида рус қурувчилари янги бинолар қурмоқда.
Грозний шаҳри эса икки марта бўлиб ўтган чечен урушида (1994—1996 ва 1999—2000 йилларда), жумладан, 1994—1995 йилларнинг қишида шаҳарга босқин пайтида катта зарар кўрган эди.
Изоҳ (0)