Мариуполдан репортаж тайёрлаган украиналик журналистлар Пулицар мукофотига лойиқ кўрилди

Associated Press агентлиги ходимлари, украиналик документалист ва видеограф Мстислав Чернов, сураткаш Евгений Малолетка, продюсер Василиса Степаненко ва европалик мухбир Лори Хиннант “Жамиятга хизматлари учун” номинациясидаи Пулицар мукофотини қўлга киритди.

Россия қўшинлари 2022 йил баҳорда Мариуполни қуршаб олганида Чернов, Малолетка ва Степаненко шаҳарда содир бўлган воқеаларни бевосита кузатган ғарб ОАВларининг ягона вакиллари эди. Хусусан, улар Россия томонидан ўққа тутилган Мариупол туғуруқхонасидан репортаж эълон қилган.

Associated Press жамоаси “Янгиликлар суратлари” номинациясида ҳам яна бир мукофотни қўлга киритди — Украинадан фоторепортаж. Мукофотни қўлга киритган сураткашлар орасида Евгений Малолетка, Эмилио Моренатти, Филипе Дана, Родриго Абд, Вадим Гидра ҳам бор.

2023 йилда мазкур мукофотнинг иккитаси The New York Times газетасига насиб этди — Россия ҳарбийлари томонидан Бучадаги тинч аҳолининг ўлдирлиши терговига бағишланган материал учун “Халқаро репортаж” номинациясида.

Шунингдек, The Los Аngels Times, The Washington Post газеталари, шунингдек, Алабамадаги AL.com нашри ҳам иккитадан мукофотни қўлга киритди.

Пулицар мукофоти журналистика соҳасидаги энг нуфузли мукофотлардан бири ҳисобланади. У 1917 йилдан бери ўз эгаларига топшириб келинмоқда.