Checheniston poytaxti Grozniy va o‘zini o‘zi respublika deb eʼlon qilgan Donetsk xalq respublikasidagi Mariupol birodar-shaharlarga aylandi. Tegishli kelishuv Grozniy meri Xas-Magomed Qodirov hamda Rossiya tomonidan tayinlangan Mariupol maʼmuriyati rahbari Oleg Morgun o‘rtasida imzolandi.
Checheniston rahbari saytida xabar qilinishicha, kelishuv Mariupolda Checheniston hukumati aʼzolarining Donbassga ishchi safari chog‘ida imzolangan. Bitim savdo-iqtisodiy, ilmiy-texnikaviy, ijtimoiy va madaniy sohalardagi hamkorlikni nazarda tutadi.
Checheniston hukumati xabarida keltirilgan DXR rahbari Denis Pushilinning so‘zlariga ko‘ra, “urush oqibatlarini bartaraf etish bo‘yicha Checheniston tajribasi DXRda allaqachon qo‘llanyapti hamda uy-joy kommunal xo‘jaligi, yo‘llar, ijtimoiy ahamiyatga ega obyektlar qurilishi kabi sohalarda ijobiy natijalar ko‘rsatmoqda”.
“Grozniyni tiklash qay sur’atda amalga oshirilgani esimizda, shuning uchun aholi punktlarini tiklash nuqtayi nazaridan respublikaning barcha foydali tajribasi biz uchun juda muhimdir”, — degan Pushilin.
Mariupol Rossiya qo‘shinlari tomonidan Ukrainaga keng ko‘lamli bosqin boshida egallangan edi. Shahar 2022-yilning may oyidan beri Rossiya nazorati ostida. Mariupol uchun janglar paytida, yuridik organlarning ma’lumotlariga ko‘ra, turarjoy binolarining 90 foizi vayron bo‘lgan. Ulardan ba’zilarining o‘rnida rus quruvchilari yangi binolar qurmoqda.
Grozniy shahri esa ikki marta bo‘lib o‘tgan chechen urushida (1994—1996 va 1999—2000-yillarda), jumladan, 1994—1995-yillarning qishida shaharga bosqin paytida katta zarar ko‘rgan edi.
Izoh (0)