Американинг Махар компанияси томонидан олинган сунъий йўлдош тасвирлари таҳлили шуни кўрсатдики, Мариупол яқинида 1500 дан ортиқ янги қабрлар пайдо бўлган, деб ёзади BBC News.
Учта янги мозорлар тасвирларини Британиянинг Ахборот барқарорлиги маркази ўрганиб чиқди. Экспертлар хулосасига кўра, қабрлар 2022 йил июнидан октябрига қадар бўлган даврда пайдо бўлган. Марказ маълумотларига қараганда, уруш давомида бу ерда жами 4600 дан ортиқ қабрлар ковланган. Мутахассислар қайд этишича, тасвирларга қараб бу ерга айнан неча киши кўмилганини аниқлаб бўлмайди.
Ёзда маҳаллий фуқаролардан бири Татяна ўз ўғлини қидириб, оммавий қабрлар ковланган жойга келган. У BBC’га маълум қилишича, ўша пайтда 800 дан ортиқ янги қабрларни кўрган. Қабрларга табличкалар ўрнатилган бўлиб, уларга исмлар ёзилмаган, фақат рақам ва жинси кўрсатилган холос. «Жасадларнинг кўпчилигининг шахси аниқланмаган», — деди аёл.
2022 йил майида Мариупол мери маслаҳатчиси Пётр Андрюшченко шаҳарда камида 22 минг киши ҳалок бўлганини маълум қилганди. Июнь ҳолатига БМТ 1348 нафар тинч аҳоли (шуларнинг 70 нафари — болалар)нинг ўлимини тасдиқлай олди, холос. БМТнинг Инсон ҳуқуқлари бўйича олий комиссари Мишел Бачелет маълум қилишича, ҳалок бўлганлар сони аслида бундан кўп марта ошиқроқ бўлиши мумкин. Шунингдек, БМТ оммавий ўққа тутишлар оқибатида шаҳарда кўп қаватли турар жойларнинг 90 фоизгача бўлган қисми зарар кўргани ёки вайрон бўлганини маълум қилганди. BBC гувоҳларга таяниб ёзишича, вайроналар остидан жасадларни чиқариб олиш ишлари сўнгги ойлар мобайнида давом этган.
Изоҳ (0)