АҚШ президенти Жо Байден бошқа давлатлар вакилларига украиналик учувчиларни Американинг F-16 қирувчи самолётларини бошқаришга ўргатишга рухсат берди. Бу ҳақда Пентагон матбуот котиби ўринбосари Сабрина Сингх матбуот брифингида маълум қилди.
“Президент машғулотларга рухсат бериш ва уларни қўллаб-қувватлаш учун яшил чироқ ёқди”, — деди АҚШ Мудофаа вазирлиги матбуот котиби.
У қўшимча маълумот бермади, лекин Дания ва Нидерландия украиналик учувчиларни тайёрлашда “етакчи рол ўйнашини” таъкидлади.
2023 йил бошидан бери Украина ҳукумати Ғарб давлатларидан Украинага замонавий қирувчилар, жумладан, Американинг F-16 самолётларини етказиб беришни фаол сўрамоқда. Июль ойида АҚШ Миллий хавфсизлик кенгашининг стратегик алоқалар бўйича координатори Жон Кирби Украина бундай самолётларни йил охиригача олиши мумкинлигини айтганди.
Аввал Politico Дания ва Нидерландия бошчилигидаги 11 давлатдан иборат коалиция украиналик учувчиларга F-16 да учишни ўргатишга тайёрлигини, бироқ АҚШнинг расмий рухсатисиз буни амалга ошира олмаслигини хабар қилди.
F-16 қирувчи самолётлари Украина армиясига фронтда тезкор муваффақиятга эришишга ёрдам бермайди, демоқда ҳарбий экспертлар Тhе Economist мақоласида.
Изоҳ (0)