Украина президенти Владимир Зеленский Украинанинг НАТОга қўшилиши “Россия учун нажот” бўлишини айтди. Унга кўра, Киевнинг альянсга кириши Украина келажакда Россияга ҳужум қилмаслигини кафолатлайди.
“НАТО бор жойда уруш бўлмайди… Украина учун НАТО ҳужум миссияси эмас, биз ҳеч қачон ҳеч қаерга ҳужум қилмаганмиз. Биз кириб бораётган ҳудудлар — ўзимизнинг ҳудудларимиз. Уларни қайта тиклаяпмиз.
Агар Украина НАТО таркибига кирса, Россия миннатдор бўлиши керак. Айнан шундай. Чунки Украина келажакда уларнинг ҳудудига ҳеч қачон келмаслиги Россия учун хавфсизликдир”, — деди Зеленский.
Унинг таъкидлашича, НАТОга қўшилган бошқа давлатлар Совет Иттифоқининг қайта тикланишидан қўрқиб шундай қилган.
Зеленскийнинг қўшимча қилишича, альянс давлатлари, жумладан, Болтиқбўйи мамлакатлари уруш тугагандан сўнг Россия билан чегараларини ҳимоя қилиш учун ўз ҳудудига Украина қўшинларини жойлаштиришдан мамнун бўлади.
Украинанинг НАТОга йўли
2022 йил 30 сентябрда Украина тезлаштирилган тартибда НАТОга аъзо бўлиш учун ариза берди. Ўшанда президент Зеленский Украина аллақачон альянс стандартларига жавоб беришини исботлаганини айтди.
Кўплаб давлатлар, жумладан Польша Украинанинг альянсга киришини қўллаб-қувватламоқда. Шу билан бирга альянс низомига кўра, уруш ҳолатида бўлган давлатлар НАТОга кириши мумкин эмас.
2023 йилнинг 11–12 июль кунлари Вильнюсда НАТОнинг навбатдаги саммити бўлиб ўтди. Унинг асосий мавзуларидан бири — имкон қадар тезроқ НАТОга аъзо бўлишни талаб қилаётган Украинанинг альянсга кириш масаласи эди.
Саммит якунига кўра, НАТОга аъзо давлатлар Украинанинг альянсга кириш жараёнини соддалаштиришга келишиб олди. G7 давлатлари эса Украина учун хавфсизлик кафолатлари тўғрисидаги баёнотни қабул қилди, унга кўра, мазкур давлатлар Киевга ҳарбий ва молиявий ёрдам кўрсатишда давом этади, шунингдек, разведка маълумотлари алмашинуви жадал олиб борилади.
Саммитдан сўнг Украина президенти Владимир Зеленский Киевнинг альянсга таклиф қилиниши умиди амалга ошмаган бўлса-да, мамлакат учрашувдан “катта ижобий натижа” олганини айтди.
Кейинроқ Украина мудофаа вазири Алексий Резников НАТОнинг навбатдаги саммитига қадар Россия—Украина уруши Киевнинг ғалабаси билан якунланишини, шундан сўнг мамлакат альянсга таклиф олишини прогноз қилди.
Резников Шимолий Атлантика альянсининг 2024 йил июль ойида Вашингтонда бўлиб ўтадиган навбатдаги саммити юбилей бўлишини эслатиб ўтди: ўшанда НАТО ташкил топганига 75 йил тўлади.
Изоҳ (0)