Қора денгизда дон ташиш ташаббусининг тақдири Ғарбга боғлиқ. Бу ҳақда Туркия президенти Ражаб Тоййиб Эрдўғон 8 август куни Туркия элчиларининг Анқарадаги йиллик конференциясида айтди.
Уруш даврида Қора денгиз портлари орқали Украина донини экспорт қилишга рухсат берган “дон битими”нинг қайта тикланиши “шу ваъдаларни бажариши керак бўлган Ғарб давлатларига боғлиқ”, дея Туркия раҳбарининг сўзларидан иқтибос келтиради AFP ахборот агентлиги.
Шу билан бирга, Эрдўғон Ғарбни “Дон ташаббуси яратган ижобий муҳитдан фойдаланиб, ўт очишни тўхтатиш ва узоқ муддатли сулҳ тузишга имкон берадиган” чоралар кўрмагани учун қоралади.
Эрдўғон Қора денгиздаги вазият ҳақида гапирди
Айни вақтда, Туркия раҳбари ўз мамлакатининг позицияси “аниқ” эканини таъкидлади. Агар уруш Қора денгизга тарқалиб кетса, бу бутун минтақа учун фалокат бўлади, деб огоҳлантирди Эрдўғон.
“Бироқ ечим топиш мумкин”, — деб қўшимча қилди у Россия президенти Владимир Путин билан яқинда бўлган телефон суҳбатига ишора қилиб.
Ўша суҳбат чоғида қўйилган “Москва талаблари” инобатга олинди, деди Эрдўғон бошқа тафсилотларни очиқламасдан.
“Дон битими” бекор қилинишидан олдин, Москва келишувнинг Россия ўғитларини экспорт қилишга оид қисми бажарилмаётганидан бир неча бор норозилигини билдирган. Шу билан бирга, Кремль Ғарбни танқид қилиб, ўз кузатувларига кўра, Украина донининг катта қисми очликдан азият чекаётган мамлакатларга юборилмаётгани, балки Ғарб бозорларида қолаётганини таъкидлади.
AFP хабарига кўра, Қора денгиз дон ташаббуси амал қилган даврда Украина ўз портларидан жаҳон бозорига 33 миллион тонна дон экспорт қилишга муваффақ бўлган.
Изоҳ (0)