Туркия президенти Ражаб Тоййиб Эрдўғон мамлакат нега Украинадаги урушни тугатишга эътибор қаратаётганини тушунтирди. Бу ҳақда Anadolu хабар берди.
Эрдўғон Анқарада бўлиб ўтган 14-Элчилар конференциясида тегишли мавзуда гапирди.
“Замонамизда Туркия кўплаб муҳим масалаларда иштирок этиш заруратга айланган давлатга айланди. Мақсадимиз мулоқот ва дипломатия йўли билан мамлакатимиз атрофида тинч, барқарор ва фаровон ҳудудни яратишдир”, — деди сиёсатчи.
У 17 июль куни Россия томонидан тўхтатилган дон битимини узайтириш масаласига ҳам тўхталиб, Туркия бу борада ҳаракатларни давом эттираётганини айтди:
“Биз ғалла ташаббусини кенгроқ миқёсда қайта бошлаш бўйича саъй-ҳаракатларни давом эттирмоқдамиз. Ўтган ҳафта Путин билан бу масалани муҳокама қилдик. Ишонаманки, бу масалада умумий махраж топа оламиз”, — деди у.
Шунингдек, сиёсатчи Туркиянинг Украинадаги урушни тугатиш бўйича позициясини яна бир бор таъкидлади:
“Туркия ўзининг мувозанатли ва адолатли муносабати билан биринчи кунданоқ Россия-Украина инқирозини ҳал қилишда муҳим давлат ролини ўз зиммасига олди. Бу борадаги ташаббусларимиз давом этмоқда”.
Эрдўғон Европа давлатларида муқаддас Қуръонни таҳқирлаш кучайиб бораётгани, ислом оламига қарши фитна уюштиришга алоҳида эътибор қаратилганини айтди.
“Туркия асрлар давомида бўлгани каби исломофобияга қарши курашнинг байроқдори бўлиб қолмоқда. Бизнинг асосий масъулиятимиз Қуръонга қилинган ҳужумларнинг олдини олиш ва нафрат жиноятлари учун жавобгарларнинг жазоланишини таъминлашдир”, — деди Президент Эрдўған.
Изоҳ (0)