АҚШ давлат котиби Энтони Блинкен Бразилия ва унинг президенти Россияни дон битимига қайтара олиши мумкинлигини айтди. Бу ҳақда GloboNews хабар берди.
Блинкенга кўра, дон битимида иштирок этмаган давлатлар ҳам ундан наф кўрган, чунки “жаҳон бозорларида озиқ-овқат кўплиги ҳисобига нархлар паст бўлган”.
“Бунда Бразилия ва унинг президенти Лула да Сильванинг овози жуда муҳим. Бу овоздан фойдаланиб, русларни келишувга қайтишга ишонтириш жуда ижобий бўлар эди. Россия озиқ-овқатдан уруш қуроли, мақсадларига эришиш учун дастак сифатида фойдаланмоқда”, — деди АҚШ давлат котиби.
У Россия мазкур битимдан чиққанидан буён барча бозорларда нархлар 10-15 фоизга ошганини таъкидлади.
Блинкен Қора денгиз дон келишуви даврида Украина 35 миллион тонна озиқ-овқат экспорт қилишга муваффақ бўлганини таъкидлади.
“Юкларнинг ярми ривожланаётган мамлакатларга, буғдойнинг учдан икки қисми паст ва ўрта даромадли мамлакатларга жўнатилди, уларнинг кўпчилиги Африкада... Дунё баланд овозда Россия бу келишувга қайтишини хоҳлашини айтмоқда. Албатта, Бразилия Россияни бунга йўналтириш учун муҳим таъсир ва овозга эга”, — деди Блинкен.
Изоҳ (0)