Туркия президенти Ражаб Тоййиб Эрдўғон Ғарб давлатларини дон келишуви бўйича Россиянинг талабларини бажаришга чақирди. Бу ҳақда “Интерфакс” хабар берди.
“Россия президенти Владимир Путин Қора денгиз бўйича дон келишуви борасида Ғарб давлатларидан ҳаракатларини кутмоқда”, — деди у ва Ғарбни бу йўналишда қадам ташлашга чақирди.
Эрдўғон россиялик ҳамкасби билан Қора денгиз ғалла ташаббусини муҳокама қилиш ниятида эканини таъкидлади.
“Ишонаманки, биз инсонпарварлик ташаббусларининг давом этишига кафолат берамиз”, — деди сиёсатчи.
У келишувнинг бекор қилиниши салбий оқибатларга олиб келиши мумкинлиги, бироқ Анқара бунинг олдини олиш учун ҳаракат қилишга тайёрлигини билдирди.
“Биз бунинг олдини олиш учун ташаббус кўрсатишдан тортинмаймиз”, — дея таъкилдлади Эрдўғон.
Дон келишувининг бекор қилиниши
Аввалроқ Туркия раҳбари ўзи ва Путиннинг дон келишуви бўйича позициялари бир-бирига тўғри келишига ишонч билдирган.
17 июль куни Россия Ташқи ишлар вазирлиги ғалла бўйича келишув тўхтатилганини маълум қилган. Москва келишувларнинг Россия талабига оид қисми бажарилганидан кейин уни қайта тиклашга тайёрлигини билдирган.
Путин, шунингдек, ҳукумат билан учрашувда Россия ғалла келишувига қарши эмаслигини ва Россия томони илгари сурган, бироқ 17 июлдаги сўнгги муддатга қадар бажарилмаган барча асосий шартлар бажарилса, унга қайтишга тайёр эканини ҳам айтган.
Изоҳ (0)