АҚШ Давлат котиби ўринбосари Виктория Нуланд Нигерга сафар қилди. У мамлакатда ҳокимиятни қўлга олган ҳарбийлар билан “ўта самимий ва бир қадар мураккаб” музокаралар ўтказди, деб хабар бермоқда Давлат департаменти матбуот хизмати.
Нуланд хунтани, агар мамлакатда қонуний ҳукумат тикланмаса, АҚШ Нигерга ҳар қандай ёрдамни тўхтатиши ҳақида огоҳлантирган. У исёнчиларга конституциявий тузумни тиклашда Американинг ёрдамини ҳам таклиф қилган.
Давлат котиби ўринбосарининг сўзларига кўра, айни дамда Нигер ҳарбийлари давлат тўнтаришига барҳам беришдан манфаатдор эмас.
“Вазият қандай тус олиши борасида уларнинг ўз фикрлари бор. Умид қиламанки, улар дипломатия учун эшикни очиқ қолдиради”, — деди Нуланд.
АҚШ расмийси, шунингдек, хунтани “Вагнер” ёлланма аскарларининг мамлакатда пайдо бўлишидан келиб чиқадиган хавфлар ҳақида огоҳлантирган.
Мен уларга “Вагнер” кириб келган мамлакатларда хавфсизлик ёмонлашаётганини, инсон ҳуқуқлари билан боғлиқ вазият оғирлашаётганини эслатдим, — деб унинг сўзларини келтирди давлат департаменти.
Нуланднинг қўшимча қилишича, ҳарбийлар агар “Вагнер” аскарлари мамлакатга таклиф қилинса, суверенитетга хавф туғдиришини яхши тушунаётгандек кўринган.
Хунта вакили Нуландга давлат тўнтариши бошланганидан бери ҳибсда қолаётган Нигер президенти Муҳаммад Базум билан учрашишга рухсат бермаган.
Нигерда ҳарбийлар давлат тўнтариши уюштирди
Нигерда ҳарбий тўнтариш 26 июль куни содир бўлди. Ўшанда хунта вакиллари республика президенти Муҳаммад Базумни ҳокимиятдан четлатганини маълум қилди. Икки кундан сўнг президент гвардияси бошлиғи генерал Абдураҳмон Чиани ўзини янги давлат раҳбари деб эълон қилди.
Кўплаб мамлакатлар давлат тўнтаришини қоралаб, президент Базумнинг зудлик билан озод этилишини талаб қилди. Бундан ташқари, Европа Иттифоқи Нигерга қарши санкциялар киритди ва қонуний ҳукумат тикланмагунча республикага барча молиявий ёрдамни тўхтатди. Ғарбий Африка мамлакатлари иқтисодий ҳамжамияти (ECOWAS) вакиллари Нигер билан барча тижорий операцияларини тўхтатди, унинг Африка марказий банкидаги активларини музлатиб қўйди ва республикага молиявий ёрдам кўрсатиш дастурларини тўхтатди.
Шунингдек, ECOWAS давлатлари Нигердаги ҳарбийларга ультиматум қўйиб, мамлакатдаги қонуний ҳокимиятни жойига қайтариш учун бир ҳафта вақт берди. Муддат 6 августда тугади, бироқ иттифоқ аъзолари огоҳлантирган чора кўрилмади — Нигерга бостириб кирилмади. Wалл Стреет Journal газетаси ECOWAS давлатларидан бирининг юқори мартабали ҳарбий зобитига таяниб, минтақа қуролли кучлари ҳали аралашувга тайёр эмаслиги ва тайёргарлик учун кўпроқ вақт кераклигини ёзди.
Изоҳ (0)