Нигерда давлат тўнтариши орқали ҳокимиятни қўлга киритган ҳарбий исёнчилар вазиятга Ғарбий Африка давлатларининг ҳарбий аралашуви эҳтимоли туфайли мамлакат ҳаво ҳудудини ёпди. 6 август куни кечқурун миллий телевидениеда ҳарбий хунта вакили Нигер устидан парвозларни тақиқлаш барча самолётларга тааллуқли экани ва “кейинги огоҳлантиришгача” амал қилишини айтди.
Унинг сўзларига кўра, бундай чорага қўшни давлатлардан борган сари яққол кузатилаётган аралашиш таҳдидлари сабаб бўлган.
“Нигер ҳаво ҳудудини бузишга қаратилган ҳар қандай уриниш кучли ва тезкор жавоб олади”, — дейилади баёнотда.
6 август куни эрталаб минглаб намойишчилар Нигер пойтахти Ниамейдаги стадионга йиғилиб, ҳокимият тепасидаги ҳарбийларни қўллаб-қувватлашини кўрсатган.
Ғарбий Африка давлатлари Нигерга бостириб киришга тайёрланмоқда
Аввалроқ Ғарбий Африка давлатлари иқтисодий ҳамжамиятига (ECOWAS) аъзо давлатлар Қуролли кучлари қўмондонлари исёнга жавобан Нигерга эҳтимолий бостириб киришга тайёрланаётгани хабар қилинганди. Нигерия пойтахти Абужада иттифоқчи давлатлар раҳбарларининг уч кунлик йиғилиши бўлиб ўтган. Унда Нигерия президенти Бола Тинубу мамлакат Сенатини Нигерга қуролли бостириб кириш чорасини маъқуллашга чақирган.
Исёнчиларга ультиматум
ECOWAS давлатлари 30 июль куни Нигердаги қўзғолончиларга ультиматум қўйиб, конституциявий тузумни бир ҳафта ичида тиклашни талаб қилган. Талаб рад этилган тақдирда улар турли чоралар, жумладан куч ишлатиш билан таҳдид қилган. 6 август куни муддат тугади, аммо талаблар бажарилмади.
Нигер ҳарбий хунтаси ECOWAS таҳдидлари фонида Қуролли кучларда муҳим кадрлар алмашинувини амалга оширди. Қуруқликдаги кучлар ва авиациядаги муҳим лавозимларга ишончли шахсларни тайинлади.
Изоҳ (0)