Украина ҳарбийлари сўнгги бир ҳафта давомида Россия армиясининг барча ҳужумларини ушлаб турди ва уларнинг олдинга силжишига имкон бермади. Бу ҳақда Украина мудофаа вазири ўринбосари Анна Маляр маълум қилди, деб ёзмоқда “Корреспондент.нет”.
Малярнинг айтишича, Бахмут, Купянск ва Лиман йўналишларида шиддатли жанглар давом этмоқда. Руслар йўқотилган позицияларини қайтариш учун Бахмут шимолида доимий ҳужумлар уюштирмоқда, аммо Украина ҳарбийлари уларни муваффақиятли қайтарди.
Қайд этилишича, жанубда украиналик ҳимоячилар аста-секинлик билан олдинга силжияпти, у ерда миналар ва ўт очишлар кўплиги боис жараён анча оғир кечмоқда.
“Мана бир неча ҳафтадирки, ўққа тутишлар сони сезиларли ўсганини қайд этяпмиз. Рақамларни келтираман: агар ўтган ҳафта душанба куни бир ҳафтада 8 000 мартага яқин ўққа тутиш кузатилганини айтган бўлсам, бу душанбагача 9 000 мартага яқин ўқ узилди” — деди Маляр.
У Россия томони Украина Қуролли кучларини кенг кўламда ўққа тутиш билан тўхтатишга уринаётганини таъкидлади.
“Бизнинг асосий натижамиз — душман олдинга силжимагани. Менимча, бу ҳамма нарсадан муҳимроқ натижа”, — дея қўшимча қилди Маляр.
Ўтган ҳафта давомида Украина ҳарбийлари Купянск, Лиман, Авдеевский йўналишларида Россия кучлари ҳужумини қайтарган.
Изоҳ (0)