Россиянинг Донецкдаги шаҳарга ракета зарбаси оқибатида 7 киши ҳалок бўлди (фото, видео)

Украина Ички ишлар вазирлиги маълумотларига кўра, 7 август куни кечқурун Россия қўшинларининг Донецк вилоятидаги Покровск шаҳрига уюштирган ракета ҳужуми оқибатида етти киши ҳалок бўлди.

Қурбонлардан бири — Украина фавқулодда вазиятлар давлат хизматининг Донецк вилояти бўйича бош бошқармаси бошлиғи ўринбосари полковник Андрей Омельченко. У 52 ёшда эди.

8 август эрталабки ҳолатга кўра, Покровскка ҳужумдан 67 киши, жумладан, 29 нафар полициячи, етти нафар қутқарувчи ва икки бола жароҳатланган. Омельченкодан ташқари беш нафар тинч фуқаро ва бир ҳарбий ҳалок бўлган.

Эрталаб қутқарув хизмати ходимлари ракета зарбалари берилган жойда вайроналарни тозалашни қайта бошлаган. Кечаси қайта-қайта ўт очилгани сабаб иш тўхтатилган эди.

Донецк вилояти ҳарбий маъмурияти раҳбари Павел Кириленконинг хабар беришича, 7 август куни Покровск марказига икки марта —  соат 19:15 ва 19:52 да “Искандар” ракеталари келиб урилган. Оқибатда шаҳарда кўп қаватли ва хусусий уй-жойлар, маъмурий бинолар, умумий овқатланиш шохобчалари, меҳмонхона вайрон бўлган ёки зарар кўрган.

Meduza Россия ҳужумининг оқибатлари акс этган кадрларни жамлади.