“ПСЖ” Килиан Мбаппенинг хулқидан ва унинг “Реал”га ўтиши мумкинлигидан норози бўлмоқда.
Эслатиб ўтамиз, франциялик ҳужумчи парижликлар билан 2024 йилда ўз ниҳоясига етадиган шартномасини янгилашни истамаяпти. Килианга Мадриднинг “Реал” жамоаси жиддий қизиқиш билдирмоқда.
Парижликларга 24 ёшли футболчи ўзини жамоа лойиҳасининг бир қисми деб ҳисобламай қўйгани ёқмаяпти. Шу билан бирга бошқа клублардан келаётган таклифлар ҳамда Париж клуби билан шартномани узайтириш вариантларини рад этмоқда.
Килиан аввалроқ клубдан текинга кетмаслик ваъдасини бериб, энди 2024 йилда эркин агент сифатида клубни тарк этишга қарор қилган.
Парижликлар раҳбарияти Мбаппенинг позициясини тушунмаяпти. Улар Мбаппе аллақачон “Реал” билан келишувга эришган деб ҳисобламоқда. Париж клуби футболчининг “қаймоқранглилар” сафига ўтиши ЕЧЛдаги асосий рақибини кучайтиришга ҳисса қўшиш бўлиб қолишини сезиб турибди.
Шу сабабли раҳбарият ФИФАга расмий шикоят юборишни режалаштирмоқда. Килиан шартномани узайтириш борасидаги шахсий суҳбатлардан ташқари саккизта интервьюсида клубга зарар келтирмасдан, текинга кетмаслигини айтиб келган, энди эса ўз фикрини ўзгартирган.
Аввалроқ, Франция президенти Эммануэл Макрон футболчини “ПСЖ”да қолишга кўндиришга уриниб кўрмоқчилиги хабар қилинганди.
Мбаппе ўтган мавсум “ПСЖ” сафида Франция чемпионлигини қўлга киритди ва 29 та гол билан турнир тўпурарига айланди.
Изоҳ (0)