Украинада тинчликка эришиш бўйича Жиддада бўлиб ўтаётган музокараларда Саудия Арабистони ўзининг тинчлик режасини эълон қилди. Бу ҳақда DPA хабар берди.
Дипломатик манбаларига кўра, янги тинчлик режаси Украина ҳудудий яхлитлигини сақлаш, барча жабҳаларда ўт очишни тўхтатиш, БМТ назорати остида тинчлик музокараларини бошлаш, асирларни алмашиш каби бандларни ўз ичига олади.
Тинчлик режасини ишлаб чиқишда Саудия Арабистонидан бошқа қайси давлатлар иштирок этганига аниқлик киритилмаган. Мамлакат расмийлари бу борада Россияни хабардор қилган. Дастлаб музокарада фақат Зеленскийнинг тинчлик режаси муҳокама қилиниши айтилганди.
Таъкидланишича, режа Россиянинг Украина ҳудудидан чиқиб кетиши, Путиннинг “ҳибсга олиниши” ва Россияни “ҳарбий жиноятларда айблашни” ўз ичига олмайди.
Саудиянинг режаси Киев тақдим этган тинчлик режасининг рус қўшинларни Украина ҳудудидан тўлиқ олиб чиқиб кетиш талабига бир оз зиддир.
Украинанинг тинчлик режаси қандай эди?
2022 йил ноябрь ойида Украина президенти урушни тугатиш бўйича 10 та шартни илгари сурганди. Украина учун тинчлик формуласи қуйидаги мажбуриятларни ўз ичига олади:
- Украинанинг радиациявий ва ядровий хавфсизлигини таъминлаш;
- Украинанинг озиқ-овқат хавфсизлигини таъминлаш;
- Мамлакатнинг энергетика хавфсизлигини таъминлаш;
- Барча маҳбусларни ва депортация қилинганларни озод қилиш;
- БМТ низомини амалга ошириш ва Украинанинг ҳудудий яхлитлигини ҳамда дунё тартибини тиклаш;
- Россия қўшинларини олиб чиқиб кетиш ва ҳарбий ҳаракатларни тўхтатиш;
- Адолатнинг қайтиши;
- Экоцидга қарши кураш;
- Эскалациянинг олдини олиш;
- Урушнинг тугашига эришиш;
Зеленский Россия Украинанинг ҳудудий яхлитлигини тасдиқлаши, ўз қўшинларини мамлакат ҳудудидан олиб чиқиб кетиши, шунингдек, урушдан етказилган зарарни қоплаши кераклигини таъкидлаган.
Бунга жавобан Россия ташқи ишлари вазири Сергей Лавров Украина амалга ошириб бўлмайдиган шартларни ўртага қўяётганини айтган эди.
Изоҳ (0)