Сенатнинг 43-ялпи мажлисида дарёлардан қум-шағал қазиб олишнинг ерости сувлари ва экологияга салбий таъсир кўрсатаётгани муҳокама қилинди.
Мажлисда дарёлар ўзанларини тозалаш ва қирғоқларини мустаҳкамлаш, норуда фойдали қазилмаларни қазиб олишнинг атроф-муҳит, сув ва йўл хўжалиги объектларига салбий таъсири юзасидан Вазирлар Маҳкамасига юборилган парламент сўрови натижалари кўриб чиқилган.
Унга кўра, Сенат қарорида белгиланган бир қатор вазифалар ижроси етарли даражада таъминланмагани, соҳадаги долзарб масалалар ўз ечимини топмагани аниқланди.
Хусусан:
- дарё ўзанларида қум-шағал қазиб олиш фаолияти билан шуғулланаётган тадбиркорлик субъектларидан лицензия ёки шартнома муддати тугагандан сўнг кон ёки участкани қабул қилиб олиш тартиби ишлаб чиқилмаган;
- дарёлардан қум-шағал қазиб олишнинг ер ости сувлари ва экологияга салбий таъсир кўрсатаётгани инобатга олиб, дарёларни тасарруф этувчи ягона органни белгилаш бўйича таклиф киритилмаган;
- Чирчиқ, Зарафшон, Оқдарё, Қашқадарё, Сангзор ва Қорадарёларидан саноат миқёсида қум-шағал қазиб олишга мораторий эълон қилиш масаласи юзасидан аниқ бир қарорга келинмаган.
- ҳудудларда норуда фойдали қазилмалар ҳамда қурилиш учун қум, чақилган тош маҳсулотлари ишлаб чиқаришга мўлжалланган ихтисослаштирилган саноат зоналарини ташкил этиш бўйича таклифлар ишлаб чиқилмаган.
Сенаторларнинг маълум қилишича, Зарафшон дарёси қирғоғида жойлашган Зарафшон миллий табиат боғи ҳудудида ерости сувлари сатҳи 3-4 метргача пасайиши оқибатида дарахтлар қуриб қолаётгани, Қорадарё ва Оқдарёда қум ва шағал ноқонуний қазиб олиниши атроф муҳит, сув ва йўл хўжалиги объектларига салбий таъсир кўрсатмоқда. Ҳозирги кунда дарёларнинг сув сатҳи 5 метрга пасайиб кетган ҳамда дарёлар ўзанлари устига қурилган автомобиль йўлларидаги кўприкларнинг таянч устунлари очилиб қолган.
Муҳокама якуни бўйича Сенатнинг тегишли қарори қабул қилинди.
Изоҳ (1)
Ассалому алейкум
Ва нихоят хакикий муаммо билан курашишни бошлашибди.
Ер ости сувлари 5 метр емас балким унданхам купрок пасайган, нафакат усимликлар куришига олиб келади
Атрофда яшайдиган 100 минглаб ахоли ер ости сувидан ичимлик суви сифатида фойдаланишади.
Манабу хакикий муаммо