Ўзбекистондаги техникумларда ҳам кредит-модуль тизимини жорий этиш режалаштирилмоқда. Бу ҳақда жамоатчилик муҳокамаси учун эълон қилинган “Ўзбекистон-2030” стратегияси лойиҳасида кўзда тутилган.
Ҳужжатга кўра, бу бўйича Вазирлар Маҳкамаси қарори лойиҳаси ишлаб чиқилади.
Таълимнинг кредит-модуль тизими жорий этиладиган таълим ташкилотлар рўйхати, ўқув жараёнига кредит-модуль тизимини жорий этишда таълим дастури, фанлар каталоги, академик мобиллик, таълим тўғрисидаги маълумотнома, кредитларни тан олиш ва кўчириб ўтказишга тааллуқли ҳужжатлар тасдиқланади.
Шунингдек, техникумларнинг ўқув юкламаси ва ўқувчи томонидан бир ўқув йилида тўпланадиган кредитлар ҳажми, ўқувчиларнинг ўзлаштиришини баҳолаш тартиби белгиланади.
Кредит-модуль тизимида ўқийдиган ўқувчиларни ўқишдан четлаштириш, қайта тиклаш, курсдан курсга ўтказиш тартиби ишлаб чиқилади.
Ушбу ҳужжат лойиҳаси муҳокамаси 15 августгача давом этади.
Кредит-модуль тизими бу таълимни ташкил этиш жараёни бўлиб, ўқитишнинг модуль технологиялари жамламаси ва кредит ўлчови асосида баҳолаш модели ҳисобланади. “Ўзбекистон Республикаси олий таълим тизимини 2030 йилгача ривожлантириш концепцияси”га кўра, мамлакатдаги ОТМларнинг 85 фоизини 2030 йилгача босқичма-босқич кредит-модуль тизимига ўтказиш белгиланганди.
Изоҳ (0)